iklan

COVALIMA, HEADLINE

Maioria eskola iha Covalima sei falta ba mobiliáriu no infraestrutura eskolár

Maioria eskola iha Covalima sei falta ba mobiliáriu no infraestrutura eskolár

Diretora Edukasaun Covalima,Elda de Fátima. Imajen/Celestina Teles.

COVALIMA, 09  fevereiru 2024 (TATOLI) – Iha Covalima eziste ona eskola hamutuk 149, hahú husi ensinu pré-eskolár to’o sekundária, maibé maioria husi eskola sira ne’e sei falta ba meza no kadeira, nomós edifísiu atu halo prosesu ensinu-aprendizajen.

Tanba ne’e, Diretora Servisu  Edukasaun Munisipál, Elda de Fátima, hakarak hadi’a kualidade edukasaun iha munisípiu refere hahú husi problema báziku sira ne’ebé daudaun ne’e iha.

Ba nia, atu alunu sira tuir prosesu aprendizajen ho di’ak maka presiza kria uluk kondisaun seguru, tenke iha mobiliáriu eskolár, nune’e estudante bele partisipa eskola.

“Ha’u foku hadi’a edukasaun husi baze, tanba haree ba realidade eskola sira ne’ebé iha Covalima ne’e maioria profesór sira laiha edifísiu permanente no estudante sira laiha kadeira, meza, nune’e alunu sira tuur de’it iha rai”, Elda de Fátima dehan ba Tatoli, ohin.

Atu haree ba kestaun alunu no profesór sira maka Edukasaun Covalima sei submete proposta ba Ministériu Edukasaun (ME) atu bele buka solusaun. Aleinde ne’e, dirijente ne’e mós sei koordena ho mentór na’in-hitu ne’ebé durante ne’e akompañia profesór sira hala’o prosesu ensinu-aprendizajen sobre nia rezultadu sira, nomós hadi’a jestaun iha edukasaun munisipál.

“Hakarak hadi’a jestaun tanba atu fahe serbisu ba funsionáriu, nune’e sira iha kreatividade no atu halo modelu jestaun oinsá, ha’u sei akompaña hela funsionáriu nia serbisu, tanba foin mak asume kargu diretora edukasaun”, dehan.

Rekorde katak iha mandatu diretór edukasaun Covalima sesante submete tiha ona pedidu kona-ba eskola sira ne’ebé falta meza no kadeira ba Ministériu Edukasaun, Juventude no Desportu (MEJD) iha Governu anteriór, maibé ladauk hetan resposta.

Kona-ba problema meza no kadeira laiha maka Eskola Bázika Filiál Lakonak Babo, iha suku Debos, postu Suai, munisípiu Covalima tuur de’it iha rai hodi tuir prosesu aprendijazen.

Liga ba infraestrutura eskolár, Diretór Servisu Edukasaun Munisípiu Covalima sesante, Francelino Freitas Carvalho, identifika ona eskola 21 ne’ebé aat atu konstrui no reabilta iha tinan 2024.

Estabelesimentu eskolá sira ne’e mak Eskola Bázika Sentrál Bulu, Gala, Fatululik, Eskola Bázika Filiál Halik, Has Ain, Fatuleto, Fatuloro, Makous, Lokeu, Aidawan Tuik, Dato-moris, Koitau, inklu eskola sekundária klase paralela Sanfuk, Salele no seluk tan.

Tuir dadus, eziste pré-eskolár públiku hamutuk 36, eskola bázika sentrál 24 no nia filiál 74, eskola sekundária lima no tékniku vokasionál tolu.

Inan-aman estudante, António  Marcal Amaral, dehan Eskola Bázika Sentrál 11 de Março iha Maucatar laiha meza no kadeira ba estudante sira iha tempu naruk ona no eskola buka meiu uza osan konsesaun eskolár hodi sosa kadeira masa, maibé kadeira refere aat hotu ona.

“Eskola EBC laiha kadeira meza ne’e kle’ur ona, la’ós foin mak akontese no eskola sempre hato’o hela de’it proposta ba iha Edukasaun Covalima, maibé to’o ohin loron seidauk iha resposta”, dehan.

Notísia relevante: Eskola neen iha Covalima hahú ona projetu konstrusaun no reabilitasaun

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!