COVALIMA, 12 outubru 2023 (TATOLI) – Edukasaun Munisípiu Covalima implementa ona Projetu Konstrusaun no Reabilitasaun Infraestrutura Edukativa (PKRIE) ba eskola neen.
Diretór Servisu Edukasaun Covalima, Francelino Freitas Carvalho, hatete konstrusaun no reabilitasaun ba eskola neen realiza tanba transfere ona 25% husi orsamentu ba konta bankaria grupu komunitáriu nian.
Tuir dadus PKRIE, iha 2023, Edukasaun Covalima iha projetu sia ho nia orsamentu hamutuk $857.818,80 no daudaun obra ne’e foin implementa ba eskola neen.
Estabelesimentu eskolár neen mak Ensinu Pré-Eskolár (EPE) Belulik Kraik (ho nia orsamentu $ 99.147,20), Orgues ($96.524,37), Suai Loro ($95.518,89), Eskola Bázika Filiál (EBF) Tobur ($84.298,13), Tilomar ($ 82.859,98) no Zulu Taz ($96.098,36)
Ba eskola tolu seluk EPE Camnasa iha verba $109.338,63, Tali Oan $108.804,91 no Eskola Bázika Sentrál Fohorem $85.228,33.
Ba PKRIE tinan oin, Edukasaun Covalima identifika ona eskola 21 ne’ebé nia kondisaun aat atu konstrui no reabilita.
Eskola sira ne’e mak Eskola Bázika Setrál Bulu, Gala, Fatululik, Eskola Bázika Filiál Halik, Has Ain, Fatuleto, Fatuloro, Makous, Lokeu, Aidawan Tuik, Dato-moris, Koitau inklu Eskola Sekundária klase paralela Sanfuk, Salele no seluk tan.
Notísia relevante: Edukasaun Covalima identifika eskola 21 atu konstrui-reabilita iha 2024
Jornalista: Celestina Teles
Editora: Maria Auxiliadora
