iklan

NASIONÁL, INTERNASIONÁL, DILI, HEADLINE

Papél média importante hodi kontribui ba promove demokrásia, pás no estabilidade

Papél média importante hodi kontribui ba promove demokrásia, pás no estabilidade

Jestór Media no Komunikasaun g7+, Helche Silvester.Imajen/TATOLI

DILI, 09 fevereiru 2024 (TATOLI) – Organizasaun intergovernmental ba Nasaun afetadu konflitu, frajil no iha tranzisaun ba reziliénsia (g7+) liuhosi Jestór Media no komunikasaun Helche Silvester, konsidera papél média importante atu promove demokrásia, pás no estabilidade iha Timor-Leste.

“Ami hakarak kolabora di’ak liu tan ho média sira, atu nune’e ita bele promove di’ak liután demokrásia, pás no estabilidade,” hateten Helche ba jornalista sira iha edifisiu g7+ Dili, sesta ne’e.

Notísia relevante: Xanana fahe esperiénsia luta ba fronteira marrítima no misaun g7+ ba entidade iha Japaun

Tanba ne’e, Média presiza foka ba promove demokrásia, pás no estabilidade atu foti ezemplu ba nasaun sira seluk katak nasaun ne’e moris iha ámbitu pás no haka’at ona ba dezenvolvimentu.

“Ita tenke foka mós ba notísia pozitivu sira kona-ba pás nian atu ema labele haree beibeik kona-bá buat negativu,” nia sujere.

g7+ mós hakarak koopera ho Konsellu Imprensa Timor-Leste (KI) atu sosializa servisu importante nian ba jornalista sira.

Iha fatin hanesan, Prezidente KI, Otélio Ote, hateten importante tebes kooperasaun ho organizasaun intergovernamentál tanba hala’o misaun importante liuliu introdús Timor-Leste ba mundu no introdús pás ba mundu.

“Jornalista hotu presiza intende no hatene kona-bá servisu g7+ nia hodi uza papél média ajuda nasaun ida frajíl ne’e sai tiha ba nasaun dezenvolvidu. Tanba kontribuisaun média nian bele halakon narativa frajíl ne’ebé agora Timor-Leste iha”, katak.

Tanba, nia dehan bainhira jornalista iha konesimentu kona-bá g7+, mak jornalista sira iha kapasidade atu hakerek informasaun ba públiku ho loloos.

Iha tinan ne’e, Programa prioridade g7+ mak promove pás no estabilidade iha nasaun membru hotu no kada nasaun membru fahe esperiénsia kona-bá rekonsiliasaun, diálogu, justisa no hala’o eleisaun ne’ebé di’ak liuhosi dalan demokrásia.

Nasaun membru g7+ hamutuk haat mak sei realiza eleisaun no g7+ sei haruka nia observadór tuun direta hodi halo observasaun no fahe mós esperiénsia kona-bá hala’o eleisaun ida ne’e iha ámbitu pás.

Rekorda fali katak, g7+ estabelese formalmente iha 2010, nu’udar organizasaun inter-governamentál husi nasaun 20 ne’ebé afeta husi konflitu no frajilidade, liuhusi fahe lisaun kona-ba harii pás no harii Estadu no halo advokásia.

Membru nasaun g7+ maka Timor-Leste, Afghanistaun, Burundi, Repúblika Sentál Áfrika, Chad, Comoros, Cote d’voire, Repúblika Demokrátika Congo, Guinea, Guinea-Bissau, Haiti, Libéria, Papua Nova Guinea, Sierra Leone, Somália, São Tomé e Principé, lha Solomon, Sudan Súl, Togo no Yemen.

Notísia relevante: MD no g7+ sei organiza konferénsia internasionál kona-bá reforma setór seguransa

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!