Japaun apoia $72.992 konstrui sala-de-aula 3 iha EBC Maubara
DILI, 16 fevereiru 2024 (TATOLI)–Embaixadór Japaun iha Timor-Leste, Kimura Tetsuya, hateten, Japaun apoiu $72.992 ba NGO HADER hodi konstrui sala-de-aula tolu iha Ensinu Báziku Sentrál (EBC) Maubara ho orsamentu $72.992 ho durasuan konstrusaun durante tinan ida.
“NGO HADER sei konstrui edifísiu eskola EBC Maubara, suku Vaviquini, munisípiu Liquiça, ho montante ba projetu refere hamutuk $72.992,” Kimura hateten ba jornalista sira, hafoin serimónia asinatura kontratu ba asisténsia finansiamentu ba projetu edifísiu eskola pre-sekundária ne’ebé realiza iha resintu Embaixada Japaun iha Temor-Leste, Pantai Kelapa, sesta ne’e.
Tanba, nia dehan, Japaun implementa ona ho susesu projetu hamutuk 138 liuhosi eskema ida ne’e, liu tinan 20 iha teritóriu Timor-Leste, ho objetivu atu benefísia komunidade lokál liuliu sira-ne’ebé iha área remota.
Embaixadór Kimura hateten, konstrusaun ba fasilidade edukasaun, kompleta ona projetu liu 40 ba melloramenta sala-de-aula eskola, sala ba mestre, haris-fatin no toba-fatin ba estudante sira.
Aleinde ida -e’e, Japonés na’in-21 agora daudaun servisu iha Timor-Leste iha programa voluntáriu kooperasaun exteriór Japaun ni’an, na’in-13 servisu hanesan mestre no asistente manorin.
Sira hirak ne’e hanorin iha eskola primária, pre-sekundaria no sekundária no universidade, no voluntúriu hirak-ne’e kontribui ba kualidade edukasaan hodi utiliza sira-nia abilidade espesiál iha edukasaun fíziku, saúde no matemátika
“La’ós de’it kualidade ba fasilidade edukasionál maibé mós kualidade hanorin iha fasilidade hirak-ne’e mós importante tebes. Aleinde kona-ba programa voluntáriu, Japaun mós fornese bolsa estudu ba mestre timoroan sira hodi aprende kona-ba edukasaun iha universidade Japaun sira. Ha’u hakarak reafirma ba imi hotu katak Japaun kontinua komprometidu hodi koopera iha parte infrastrutura no rekursu umanu iha setór edukasaun,” nia dehan.
Governu Japaun apoia ona projetu eskala boot, inklui konstrusaun ba infrastrutura, apoia indústria sira no mós projetu eskala kiik sira-ne’ebé benefísia direta komunidade lokál sira.
Prezidente Autoridade Munisípiu (PAM) Liquiça, Paulino Ribeiro, hateten Governu lokál sempre fó atensaun manutensaun ne’e kontinua ba futuru , nune’e bele uza ba longu prazu ka tempu naruk
“Hosi embaixadór nian ba pontu de vista katak manutensaun ne’e buat ne’ebé prioridade tebes ,nune’e Governu sentrál servisu ho Governu lokál buka verba ruma para kontinua tau matan ba manutensaun sira no asegura obra ba tempu naruk,” nia dehan.
Japaun Anúnsia Asesténsia Foun ba Melloramente Fasilidade Edukasaun ba Labarik sira iha Liquiça.
Diretór Ezekutivu NGO HADER, Manuel Lopes da Crus, hateten ohin asina ona no hein osan tama, segunda (19 fevereiru 2204) semana oin hahú konstrusaun ba sala-de-aula tolu ne’e.
Estudante sira-ne’ebé daudaun ne’e, sekola iha Eskola Ensinu Báku (EBC) Maubara, munisípiu Liquiça ne’e ho totál hamutuk 522.
Jornalista : Osória Marques
Editór : Cancio Ximenes
