DILI, 19 fevereiru 2024 (TATOLI)—Meza Parlamentu Nasionál (PN), segunda ne’e, liuhosi reuniaun plenária anúnsiu admisaun no baixa ba Komisaun A trata asuntu Justisa no Konstituisionál ba projetu-lei númeru 3/VI(1a)-Rejime Jurídiku exersísiu direitu petisaun hodi fó apresiasaun inisiál.
“Anúnsiu admisaun no baixa ba komisaun A projetu-lei númeru 03/VI(1a)-Rejime Jurídiku exersísiu direitu petisaun, tanba ne’e importante iha máteira lubun ida komisaun A atu haree. Tanba, ha’u husu mós nota ademesibilidade ho rekomendasaun lubun ida atu fó ba komisaun A hodi haree,” Prezidente Parlamentu Nasionál, Maria Fernanda Lay, fó sai iha sala plenária PN.
Prezidente PN ne’e, seidauk esplika konteúdu detallu ba projetu-lei ne’e tanba komisaun sei fó uluk ninia apresiasaun uluk.
Enkuantu Parlamentu Nasionál mak órgaun soberania Repúblika Demokrátika Timor-Leste (RDTL) nian ne’ebé reprezenta timoroan tomak, ne’ebé iha kbiit atu halo lei, fiskaliza no halo desizaun polítika tuir konstituisaun artigu 92.
Tuir Rejimentu Parlamentu Nasionál (RPN) iha Artigu 102.º (Lejislasaun kona-ba serbisu) bainhira simu lejislasaun kona-ba serbisu, komisaun tenke fó oportunidade ba organizasaun sindikál ka patronal, no mós Governu atu hato’o sira-nia apresisaun ba projetu ka proposta lei, iha prazu ne’ebé komisaun fixa tuir finalidade ne’ebé prevee iha artigu 80.º
Iha RPN artigu 103.º (Prazu ba apresiasaun dahuluk ba inisiativa iha komisaun), iha númeru 1 hateten komisaun hato’o ninia apresiasaun liuhosi relatóriu ida hodi fundamenta ninia paréser, iha prazu ne’ebé prezidente marka.
RPN artigu 105.º (Inísiu diskusaun) ne’ebé iha númeru 1 prevista katak, diskusaun iha jeneralidade foka ba prinsípiu no sistema projetu ka proposta lei ida-idak nian no iha artigu 109.º Diskusaun iha espesialidade foka ba artigu ida-idak, nune’e diskusaun faze jeneralidade no espesialidade tama kontinua votasaun finál globál.
Jornalista : Nelson de Sousa
Editór : Cancio Ximenes
