ME koordena ho INDIMO, I.P apoia formasaun ba profesór ensinu tékniku vokasionál
DILI, 24 fevereiru 2024 (TATOLI)—Diretór Nasionál Ensinu Tékniku Vokasionál, Fernando Mouzinho Gama, hateten ME koordena ho Instituisaun Nasionál Dezenvolvimentu Mão de Obra, Institutu Públiku (INDIMO, I.P) atu apoia formasaun área produtivu nian ba profesór ensinu tékniku vokasionál nian.
“Formasaun ba profesór área produtivu nian ita halo ona koordenasaun ho Brazil no Ministériu Edukasaun mós liuhosi tékniku vokasionál, atu halo koordenasaun ho Instituisaun Nasionál Dezenvolvimentu Mão de Obra (INDIMO) hodi haree ba sistema ba formasaun nian. Tanba, ba tinan ida-ne’e formasaun ba ensinu tékniku vokasionál mak dahuluk ita haree formasaun ba profesór sira. Daruak mak melloramentu jestaun adminitrasaun eskolár no ikus ita hakarak infraestrutura liuliu ba fasilidade,” Diretór ne’e hateten ba Agência Tatoli, iha Ministériu Edukasaun, Vila Verde, sesta ne’e.
Ida-ne’e, nia dehan, presiza halo tanba profesór sira ladún iha formasaun espesífika programa produtivu ne’ebé bele aumenta estudante nia abilidade, entaun ME iha planu no hakarak fó formasaun ba profesór sira iha área produtivu.
“Formasaun área produtivu ne’e ita koloka maizumenus 50 ba leten maibé ita tenke koordena fali ho INDIMO atu fó formasaun ba ita-nia profesór. Tanba, área ne’ebé ita define ne’e INDIMO rasik sei buka meiu ida ba tékniku espesialidade nian nune’e ita-nia profesór bainihira tuir formasaun labele iha difikuldade,” nia hateten.
Totál eskola ensinu tékniku vokasionál públiku hamutuk 32, maibé hamutuk ho ensinu tékniku vokasionál privada no katólika hamutuk 50 ho totál profesór iha territóriu ensinu tékniku sira kuaze r4.000.
Entretantu. ko’alia kona-ba infraestrutura Ministériu Edukasaun tau ona planu atu hetan ekipamentu prátika nian ba laboratóriu ofisina nian mak tinan 2023 halo ona akizisaun no tinan oin sei distribui.
“Ba tinan 2024, ita laiha osan tanba osan ne’ebé pedidu ne’ebé ita iha la hetan aprovasaun maibé ida-ne’e la taka dalan mai ami atu kontinua esforsu. Ita foin mak ensinu tékniku vokasionál públiku rua ka tolu mak iha ekipamentu kompletu hanesan STM Becora no seluk mak Eskola Maumali Maliana nian, inklui ensinu tékniku vokasionál privada sira, públiku barak mak laiha.” Nia esplika.
Jornalista : Osória Marques
Editór : Cancio Ximenes
