Profesór 600 sei tuir formasaun dijitalizasaun literásia
DILI, 26 fevereiru 2024 (TATOLI)-Prezidente Institutu Nasionál Formasaun Dosente no Professionál Edukasaun (INFORDEPE), Domingos Martins, informa iha fulan-marsu tinan ne’e sei hahú fó formasaun ba profesór 600 kona-ba dijitalizasaun literásia ne’ebé sei konsentra iha eskola hamutuk 30 iha munisipiu tolu.
UNICEF Timor-Leste servisu hamutuk ho INFORDEPE hodi hahú implementa formasaun ne’e fazeadamente durante iha tinan 2024.
Notísia Relevante :ME nafatin fó formasaun ba profesór liuhosi projetu PRO-Portugés
“Ita-nia parseiru UNICEF sei fó formasaun dijitalizasaun literária ba eskola 30 ho profesór 600. Agora kona-ba formasaun ba profesór pre-eskolár ne’e parseiru HANS mak fó formasaun ne’ebé hanesan,” Prezidente INFORDEPE hateten ba TATOLI, iha ninia servisu fatin, Balide, Dili, segunda ne’e.
Nia dehan molok atu realiza formasaun ne’e iha fulan-marsu faze dahuluk iha munisipiu Ainaro, Ermera no Liquiça, INFORDEPE daudaun ne’e fó hela formasaun ba formadór hamutuk na’in-10 hodi implementa programa formasaun ne’e.
“Formasaun ba era dijitalizasaun ho modelu online no ofline hetan apoiu hosi UNICEF, HANS no ajénsia sira seluk. Ami ba koordena no haree hamutuk asuntu formasaun ba profesór pre-eskolár to’o nível sekundáriu nian nune’e ita prevee orsamentu purvolta miliaun $1.199 no ami tenta ezekuta tuir nia kbiit,” nia hateten.
Tuir nia data tentativa ba formasaun ne’e sei hala’o depois ezame primeiru periodu 2024 no formasaun ne’e rasik sei hala’o ho durasaun semana ida ho oras normal 40.
Entertantu, antes ne’e, Ministra Edukasaun, Dulce de Jesus Soares, hateten iha tinan 2024 ne’e mós sei kontinua fó formasaun ba profesór sira liuliu ba profesór lingua portugeza liuhosi projetu PRO-portugés ne’ebé maka Governu Timor-Leste estabelese ho Governu Portugués.
Nune’e mós Diretór Nasionál Ensinu Tékniku Vokasionál, Fernando Mouzinho Gama, hateten ME koordena ho Instituisaun Nasionál Dezenvolvimentu Mão de Obra, Institutu Públiku (INDIMO, I.P) atu fó mós apoia formasaun ba profesór ensinu tékniku vokasionál kona-ba área produtivu nian.
“Formasaun ba profesór área produtivu nian ita halo ona koordenasaun ho Brazil no Ministériu Edukasaun mós liuhosi tékniku vokasionál, atu halo koordenasaun ho Instituisaun Nasionál Dezenvolvimentu Mão de Obra (INDIMO) hodi haree ba sistema ba formasaun nian. Tanba, ba tinan ida-ne’e formasaun ba ensinu tékniku vokasionál mak dahuluk ita haree formasaun ba profesór sira. Daruak mak melloramentu jestaun adminitrasaun eskolár no ikus ita hakarak infraestrutura liuliu ba fasilidade,” Diretór ne’e hateten ba Agência TATOLI, iha Ministériu Edukasaun, Vila Verde, foinlalais ne’e.
Totál eskola ensinu tékniku vokasionál públiku hamutuk 32, maibé hamutuk ho ensinu tékniku vokasionál privada no katólika hamutuk 50 ho totál profesór iha territóriu ensinu tékniku sira kuaze 4.000.
“Formasaun área produtivu ne’e ita koloka maizumenus 50 ba leten maibé ita tenke koordena fali ho INDIMO atu fó formasaun ba ita-nia profesór. Tanba, área ne’ebé ita define ne’e INDIMO rasik sei buka meiu ida ba tékniku espesialidade nian nune’e ita-nia profesór bainihira tuir formasaun labele iha difikuldade,” nia hateten.
Notísia Relevante :Dosente 104 sei disponibiliza formasaun ba profesór rihun-resin
Jornalista :Osória Marques
Editór : Agapito dos Santos
