DILI, 27 fevereiru 2024 (TATOLI)—Ministériu Asuntu Kombatente Libertasaun Nasionál (MAKLN), tersa ne’e, lansa portál rejistu kombatente ho link https://macln.net/ no iha tempu hanesan halo abertura ba vaga bolsa estudu ba tinan letivu 2024.
“Ohin ofisialmente ha’u lansa portál konsulta kombatente no abertura bolsa estudu 2024 ba veteranu no mártir nia oan hamutuk 1.300,” Ministru Asuntu Kombatente Libertasaun Nasionál, Gil da Costa Monteiro ‘Oan Soru’, hateten, iha salaun Aisirimou, Comoro.
Portál ne’e atu fasilita ema hotu bele asesu servisu MAKLN no veteranu sira bele asesu dadus ruma, la presiza to’o mai iha Dili, maibé bele haree liuhosi portál online.
Enkuantu, kona-ba bolsa estudu, ekipa téknika sei tun ba munisípiu hotu inklui Rejiaun Administrativa Espesiál Oé-cusse Ambeno (RAEOA) hodi halo rejistu ba kandidatura bolsa estudu hahú iha loron 05 marsu no ramata iha loron 03 abríl 2024, ne’ebé fatin inskrisaun iha edifísiu Konsellu Kombatente Libertasaun Nasionál estabelesidu iha rejiaun.
Notiia relevante : MAKLN prevee millaun $1,1 hodi fó bolsa estudu ba veteranu nia oan
Programa ne’e bazeia ba númeru 2 hosi artigu 26.º EKLN, ne’ebe regula iha dekretu-lei númeru 8/2009, 15 janeiru kona-ba rejime atribuisaun bolsa estudu ba veteranu no mártir libertasaun nasionál nia oan, nune’e iha tinan letivu ne’e MAKLN hasai ona despaisu númeru 02/MACLN-IXGC/1/2024 ne’ebé maka hatúr kedas númeru ba vaga sira ne’ebé maka hakerek iha númeru 2 hosi despaisu ne’e bazeia ba nível ensinu sira.
Atribuisaun ba bolsa estudu tinan letivu 2024 ne’e ho totál alokasaun orsamentu $1.127.750 ba bolseiru 1.300, hahú hosi ensinu báziku to’o ensinu superiór.
Ba ensinu báziku siklu 1o hamutuk 65 kada munisípiu ba ema na’in-lima, ensinu báziku siklu 2o no 3o hamutuk 195 kada munisípiu ba ema na’in-15, ensinu sekudária hamutuk 325 kada munisípiu ba ema na’in-25, ensinu superiór universitáriu iha rai-laran hamutuk 350 kada munisípiu ba ema na’in-50 no ensinu superiór iha rai-liur 65 kada munisípiu ba ema na’in-lima.
Kada tinan, ba kada bolseiru ensinu báziku siklu 1o sei hetan osan ho montante $300, ensinu báziku siklu 2o no 3o hetan $600, ensinu sekudária $650, ensinu superiór Universitáriu Timor-Leste $1.000 no ensinu superiór rai-li’ur $2.000.
“Ha’u husu ba maluk verenu sira iha munisípiu, bainhira ekipa rejistu tun labele impoin imi-nia oan na’in-rua ka tolu, obriga ekipa tenke hatama imi-nia oan hodi asesu hotu ba bolsa estudu ne’e, maibé tenke koopera ho pontu vogál sira hodi fó mós oportunidade ba maluk sira seluk nia oan asesu hotu,” Oan Soru fó hanoin.
Jornalista : Arminda Fonseca
Editora : Julia Chatarina
