Autoridade sei loke kuotasaun reabilita dormitóriu eskola agríkola Oé-Cusse
OÉ-CUSSE, 28 fevereiru 2024 (TATOLI) – Sekretária Rejionál bá Asuntu Agrikultura, Filomena Sila, fó sai, iha tempu badak sei loke kuotasaun ba públiku hodi halo reabilitasaun ba dormitóriu Eskola Tékniku Agrikola Rejiaun Oé-Cusse (ETARO) no fornese mós mobiliáriu atu haforsa ensinu aprendizajen.
Notísia relevante: Eskola Agríkola Oé-Cusse presiza mobiliáriu no profesór atu haforsa ensinu no aprendizajen
Sekretária Rejionál ba Asuntu Agrikultura, Filomena Sila, informa, ba dirijénte eskola ETARO, bainhira oferese apoia foos saka 142 iha sentru formasaun ETARO, suku Lifau sub-rejiaun Pante Makasar, tersa ne’e.
“Ita-boot sira-nia pedidu kona-bá dormitóriu eskola nian inklui mobiliáriu, ami simu ona no haree ona, daudaun ne’e ami submete ona iha Sekretária Rejionál Finansa, atu loke kuotasaun, nune’e bele atende ita-boot sira-nia pedidu antes ne’e,” nia dehan iha momentu ne’e.
Entretantu, antes ne’e, Diretór eskola ETARO, José Kehi, informa, problema ne’ebé enfrenta iha ámbitu vizita ofisiál hosi Sekretária Rejionál ba Asuntu Agrikultura, nu’udar vizita dahuluk hafoin simu pose nu’udar Autoridade RAEOA.
“Ami iha-ne’e problema prinsipál haat, primeiru ami presiza mobiliáriu meza no kadeira tanba menus, profesór nian ida-ne’e ami presiza aumenta, depois kondisaun dormitóriu ba estudante sira mós aat ona, ne’ebé ami husu ba autoridade bele konsidera,” José kehi, relata iha ámbitu vizita ofisiál ne’e.
Notísia relevante:Autoridade apoia foos saka 142 bá estudante Agríkola Oé-Cusse
Purtantu, Eskola Tékniku Agrikola (ETARO), lokaliza iha aldeia Sanane, suku Costa, dezde 2012, no daudaun ne’e iha estudante na’in-121 mak hala’o estudu ho totál profesór hamutuk na’in-26.
Jornalista: Abílio Elo Nini
Editór: Evaristo Soares Martins
