OÉ-CUSSE, 27 fevereiru 2024 (TATOLI) – Autoridade Rejiaun Administrativa Espesial Oé-Cusse Ambeno (RAEOA) liuhosi Sekretária Rejionál ba Asuntu Agrikultura, tersa ne’e apoia foos saka 142 ba estudante Tékniku Agríkola Oé-Cusse (ETARO) iha iha sentru formasaun ETARO suku Lifau, sub-rejiaun Pante Makasar.
Notísia relevante: Eskola Agríkola Oé-Cusse presiza mobiliáriu no profesór atu haforsa ensinu no aprendizajen
Sekretária Rejionál ba Asuntu Agrikultura, Filomena Sila, informa, apoia ne’e hosi Prezidente Autoridade, hodi tulun estudante sira, tanba pedidu ne’ebé submete ba iha Autoridade urjente.
“Pedidu ne’ebé ita-boot sira hato’o mai, ha’u hato’o kedas ba iha Prezidente RAEOA, tanba ita-boot sira presiza urjente ita tenke atende uluk, tanba estudante hala’o atividade prátika iha fatin ne’e presiza hahán,” Filomena Sila, ko’alia iha suku Lifau.
Iha biban hanesan, Diretór Eskola ETARO, José Kehi, informa, pedidu ne’ebé husu apoia urjente, tanba daudaun ne’e estudante na’in-66 hala’o prátika ba programa rua.
Kona-bá Formasaun Kontestu Traballu (FCT, sigla portugés) no Programa Provas Aptidaun Profesionál (PAP) ho durasaun oras 500 iha fulan rua ho balun iha suku Lifau, sub-rejiaun Pante Makasar.
“Agradese ba Autoridade liuhosi servisu agrikultura, tanba bele apoia estudante sira, atu uza durante hala’o prátika fulan tolu nia laran,”nia orgullu.
Notísia relevante:Agrikultura Oé-Cusse aloka $10,750.00 kompra fini ai-oan ba sentru viveru haat
Entretantu, totál estudante ne’ebé eskola iha Eskola Téknika Agríkola Rejiaun Oé-Cusse hamutuk na’in-121 ho totál profesór hamutuk na’in-26.
Jornalista: Abílio Elo Nini
Editór: Evaristo Soares Martins
