Presiza konvida estudante iha komemorasaun loron nasionál veteranu
COVALIMA, 03 marsu 2024 (TATOLI) – Administradór Munisípiu Covalima, Francisco de Andrade triste tanba komemora loron nasionál veteranu ba dahuluk iha munisípiu Covalima la konvida estudante no funsionáriu sira atu partisipa.
Komemorasaun loron nasionál veteranu ba dala-hitu ne’e hala’o iha munisípiu Covalima, ho tema “Juntos Marcharemos para o futuru” hodi hala’o atividade serimónia hasa’e bandeira iha resintu Administrasaun Munisípiu Covalima.
“Ha’u triste iha komemora loron nasionál veteranu la konvida funsionáriu no estudante sira atu partisipa. Tuir loloos tenke konvida sira, tanba funsionáriu no estudante sira mak jerasaun kontinuadór,” Autoridade Covalima ko’alia iha salaun AMC, Sukaer-laran, domingu ne’e.
Ho komemorasaun loron nasionál veteranu iha Covalima hanesan parte ida atu promove loron nasionál veteranu, tanba joven barak seidauk hatene loron nasionál veteranu.
“Ita komemora loron nasionál veteranu ba dahuluk iha Munisípiu Covalima ba futuru tenke komemora beibeik iha munisípiu nune’e ita bele promove loron nasionál veteranu, ema hotu bele hatene se lae 03 marsu veteranu mak hatene komunidade balun la hatene,” nia fó hanoin.
Prezidente CMCLN, Osorio Soares “Mausoko” klarifika, komemora loron nasionál veteranu dahuluk iha munisípiu Covalima la konvida estudante no funsionáriu sira tanba tempu mak limitadu atu halo preparasaun.
“Tuir loloos ha’u konvida estudante hotu, maibé haree ita-nia tempu limitadu, se karik simu orientasaun molok fulan ida entaun estudante sira bele mai partisipa maibe ha’u promete ba futuru sei konvida estudante sira,” nia dehan.
Prezidente CMCLN apela veteranu no ba joven tenke hamutuk hodi kolobora ho Governu nune’e Governu bele lori dezenvolvimentu ba oin hodi haree ba futuru ne’ebé prósperu.
Notísia relevante: PR enkoraja Asosiasaun Veteranu partisipa ativu iha prosesu diversifikasaun ekonómika-sosiál
Jornalista: Celestina Teles
Editór: Evaristo Soares Martins
