DILI, 05 marsu 2024 (TATOLI)—Universidade Nacional Timor Lorosa’e (UNTL) servisu hamutuk ho Universidade Coimbra (UC) iha Portugál, halo selesaun ba estudante na’in 50 hodi frekuenta segunda edisaun kursu Mestradu Direitu.
Vise-Reitór Programa Post Graduadu no Peskiza iha UNTL, Afonso de Almeida, konsidera parseria entre UNTL no UC kontribui makaas ba reforma setór justisa iha nasaun ne’e, promove respeitu ba direitu umanu, igualdade iha lei nia oin no dezenvolvimentu sosiedade ida-ne’ebé justu, ekuitativu no prósperu liu.
“Importante tebes ita kolabora ho Portugál, tanba maioria ita nia-lei hakerek ho lian Portugés,” Afonso de Almeida hateten ba Agência Tatoli, iha kampus sentrál, UNTL, tersa ne’e.
Tuir dosente ne’e, kuaze dixiplina hotu-hotu sei hanorin distánsia, tanba maiória profesór sira hosi Universidade Coimbra (UC) iha Portugál.
Reitór Universidade Nacional Timor Lorosa’e (UNTL), João Martins, deklara objetivu hosi kursu ne’e atu responde espetativa komunidade timoroan sira hodi hakle’an ensinu jurídiku iha Timor-Leste, tanba UNTL iha kompromisu hodi forma pesoál kualifikadu komprometidu ho progresu sosio-ekonómiku no kulturál iha nasaun ne’e.
“Kursu ida-ne’e nia objetivu atu oferese ensinu jurídiku ho kualidade aas ne’ebé atende ba nesesidade formasaun avansada hosi jurista interresadu sira hodi tuir karreira akadémika. Bainhira nesesidade sira-ne’e sei buka atendimentu di’ak iha lejislasaun Timor-Leste hodi dezenpeña funsaun hanesan konsultór jurídiku, advogadu ka majistradu sira,” nia hateten.
Profesór iha Fakuldade Direitu Universidade Coimbra (UC) Portugál, João Monteiro, hateten katak UC disponivél atu kontribui ba susesu kursu Mestradu Direitu no ba dezenvolvimentu siénsia jurídiku timoroan nian.
Jornalista : Osória Marques
Editór : Cancio Ximenes
