DILI, 06 marsu 2024 (TATOLI) – Governu liuhosi Ministériu Juventude, Desportu, Arte no Kultura (MJDAK) liuliu Diresaun ne’ebé trata asuntu juventude esforsu atu halo ajustamentu ka alinamentu planu nasionál juventude tuir planu ASEAN.
“Importante hosi parte juventude nian bainhira ita adere ona ba ASEAN presiza iha alinamentu politika ita nian ho ASEAN atubele iha konetividade. Maibé iha Timor-Leste ita iha politika nasionál juventude ne’ebé aprova hosi Konsellu Ministru iha 2016, ida ne’e mak ita utiliza to’o ohin loron, entaun ita nia servisu agora mak halo analiza oinsa bele ajusta ita nia politika nasionál ho ASEAN nian, agora ita servisu hela ba ida ne’e,” Diretór Jerál Juventude MJDAK David Tomas de Deus ba Agência TATOLI iha Lecidere, kuarta ne’e.
Timor-Leste atu adere ba ASEAN nu’udar membru permanente tenke ajusta politika nasionál juventude hanesan ho temátika lima ne’ebé ASEAN iha.
“Ita agora sei hanesan membru observadór, entaun ita nia ekipa ba juventude nian servisu makas hela bainhira ita sai ona membru permanente buat hotu liga ba juventude nian laiha tan problema, halai los ona ho ASEAN nian,” nia katak.
Ekipa ASEAN fó formasaun ba ekipa ME no MJDAK
Atu halo servisu másimu iha área juventude nian ligasaun ho ASEAN ekipa hosi sekretariadu ASEAN hamutuk ema na’in rua mai fó formasaun ba ekipa hosi Ministeriu Edukasaun (ME) no MJDAK durante loron tolu hahú 04-06 marsu.
“Ekipa sekretariadu ASEAN nian mak fó formasaun ba ekipa hosi Ministeriu Edukasaun no Ministeriu Juventude Desportu Arte no Kultura nian. Formasaun ne’e foku ba oinsa ita bele halo preparasaun ne’ebé másimu antes sai nu’udar membru peramanente saida mak ita sei halo, sira hanorin ita kona-ba oinsa organiza reunia boot sira ASEAN nian ligadu ho juventude, hanorin ita kona-ba protokolu, no kapasitasaun iha rekursu umanu,” nia katak.
Durante formasaun sira foku liu ba kapasitasaun rekursu umanu konsege identifika nesesidade balu liga ba asuntu juventude. Ho nune’e ekipa ME no MJDAK sei esforsu halo servisu balu atu haruka ba sekretariadu ASEAN nune’e bele submete proposta ba parseiru dialogu ASEAN nian oinsa bele apoiu liu ba kapasitasaun rekursu umanu.
“Durante iha ne’e sira esplika kona-ba asuntu juventude nian oinsa mak bele halo servisu másimu liu ba setór importante ne’e. Sira mós aprezenta ba ita kona-ba evaluasaun no monitorin boot liu iha nivél ASEAN nian liliu pilar Sosiu Kulturál espesifiku ba juventude,” nia hatete.
Iha okaziaun ne’e ko’alia mós kona-ba Programa ASEAN Traveling Resourse Person Programe atu nune’e Timor-Leste bele hatene klean kona-ba lala’ok ASEAN nian ba dezenvolvimentu juventude.
Jornalista: Hortencio Sanchez
Editór : Florencio Miranda Ximenes
