iklan

HEADLINE, SEGURANSA

Governu kongratula feto PNTL no MI

Governu kongratula feto PNTL no MI

Ministru Interiór, Francisco da Costa Guterres. Imajen Tatoli/Francisco Sony

DILI, 08 marsu 2024 (TATOLI) – Ministru Interiór (MI) Francisco Guterres, lori Governu nia-naran kongratula feto iha institusaun Polísia Nasionál Timor-Leste no feto hosi Ministériu Interiór (MI).

Governante ne’e hateten, feto ne’e hola papél importante ida iha família no ba nasaun. Tanba aleinde nia halo servisu hanesan ema servidór, nia mós halo funsaun hanesan inan ida hodi servi família, tau matan ba oan sira no sai edukadora ba oan.

“Edukasaun dahuluk la’os mai hosi eskola, maibé mai hosi inan, tanba inan mak tenke prepara oan liuhosi fó edukasaun primaria, hahú hosi uma laran to’o ba fatin eskola. Tanba ne’e, inan mak sai hanesan edukadora oinsá hodi prepara futuru nasaun ba aban bain rua. Ho nune’e mundu rekoñese sira no ohin ita komemora loron mudiál ba feto, lori IX Govenu Konstitusionál nia naran hakarak hato’o parabens ba feto hosi Polísia Nasionál Timor-Leste no Ministériu Interiór Interiór”, Francisco Guterres liuhosi nia intervensaun iha ámbitu komemorasaun loron mudiál feto ne’ebé selebra iha Komandu Jerál PNTL Caicoli, sesta ne’e.

Nia dehan, MI no Komandu PNTL iha fulan kotuk aprova ona kódigu konduta ida atu proteje no kuidadu feto iha fatin servisu.

“Ha’u hakarak dehan iha ne’e katak ba oin Komandu tenke implementa kódigu konduta ida-ne’e, hodi proteje feto PNTL sira iha servisu fatin no iha fatin ne’ebé de’it. Hanesan mane ne’ebé halo kna’ar iha institusaun PNTL oinsá mak nia bele defende nia maluk feto sira iha servisu fatin, atu feto sira bele halo servisu ho di’ak, ida-ne’e mak importante”, nia adianta.

Ministru husu ba feto PNTL no MI atu halo servisu ho kuidadu aan, tenke tau aan didi’ak.

“Kuidadu imi nia aan, tau imi aan didi’ak, tanba labarik sira atu sai di’ak ka atu sai aat, haree ba imi, sira (labarik) la haree ba ami mane sira ne’e. Feto mak sai edukadora ba sira tanba feto eduka oan ne’e ho domin duni, tanba ne’e inan hanesan espellu ba sira”, nia afirma.

“Kuandu inan-nia karater oinsá oan sira sei la’o tuir ida-ne’e, tanba ne’e ha’u husu ba inan sira, tau imi-nia aan didi’ak, atu eduka oan sira, nun’e oan sira bele kontribui ba prosesu dezenvolvimentu”, nia konklui.

Governante ne’e mós louva Instituisaun PNTL tanba iha PNTL, feto nain tolu mak okupa deviza Ofisiál Superiór.

“Iha instituisaun PNTL feto nain tolu mak ho diviza Ofisiál Superiór, ida-ne’e hatudu katak instituisaun PNTL iha ona progresu no ba Governu kompromete katak sei hakbi’it liu tán feto atu túr iha pozisaun sira hanesan ne’e”, nia revela.

Feton hirak ne’e mak mak okupa deviza Ofisiál Superiór mak atuál Komandante Komandu Administrasaun Finansas Komandu Jerál, Superintendente Xefe Polísia Natercia Martins, Superintendente Polísia  Umbelina Soares asume kargu nudar Komandante PNTL Manatutu no Superintendente Polísia nudar Xefe Departementu Unidade Apoa Servisu Komandu  Jerál PNTL.

Iha fatin hanesan, Komandante PNTL, Komisáriu Jerál Polísia, Henrique da Costa, hateten iha institituisaun PNTL, agora dadaun, feto hamutuk 600 asume kargu iha PNTL signifika katak Komandu PNTL fó oportunidade ba feto hodi halo servisu tuir prinsípiu gualidade jéneru.

“Agora daudaun hosi ajente, sarjentu no to’o ofisiál superiór sira, Komandu PNTL atribui servisu ba sira no sira halo servisu ho kualidade hanesan mós ho membru PNTL sira seluk”, nia dehan.

Nia dehan, Komandu la halo diskriminasaun ba feto sira, maibé fó oportunidade ba sira hodi halo servisu hanensan membru polísia sira seluk ne’ebé sujeita ba tarefa servisu no méritu servisu idaidak nian hanesan igualidade iha tratamentu bainhira halo funsaun.

Herique hateten, Komandu PNTL fó fi’ar ba feto ida sai komandante munisípiu, feto nain tolu sai Xefe Departamentu iha Komandu Jerál PNTL no nain sia seluk hanesan Komandante Eskuadra no 11 i hanesan Xefe Sesaun apoia vítima vuneravel sira hodi fó asisténsia ba feto vuneravél sira inklui feto nain-10 halo funsaun polísia ofisiál suku.

“Ami sei buka meius oioin hodi kontinua fó apoia ba feto PNTL, liuhosi ami-nia gabinete jéneru PNTL hodi haforsa no kapasita feto hodi ka’er ba funsaun sira iha Komandu PNTL”, nia katak.

Komandante Jerál PNTL ne’e kongratula ba feto PNTL sira iha ámbitu komorasaun loron mundiál feto nian.

“Ha’u kongratula ba feto PNTL sira no feto hotu iha Timor-Leste parabens ba imi hotu”, nia kongratula.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!