DILI, 11 marsu 2024 (TATOLI)– Prezidente Repúblika (PR), José Ramos Horta, partilla hanoin balun ho Estadu Unidu Amérika (EUA) liuhosi Vise Sekretária Estadu Adjuntu Assuntu Aziátiku no Pasifiku Leste Departementu Estadu Unidu Amérika (EUA),Melissa A. Brown, hodi ko’alia no partilla hanoin balun kona-bá konflitu sira ne’ebé mosu iha mundu liuliu konflitu iha Myanmar.
“Ohin. Ha’u mai atu husu Prezidente Horta nia sabedoria, nia konesimentu kona-bá asuntu internasionál, rejionál liuliu kona-bá konflitu sira iha Myanmar. Ami mai husu nia (Prezidente Horta) nia hanoin kona-bá ne’e,” Vise Sekretária Estadu ne’e hatene ba Jornalista sira iha Palásiu Prezidensiál-Bairru-Pite.
Iha okaziaun ne’e parte rua ko’alia mós kona-ba relasaun Timor-Leste ho EUA nian. “Ha’u ho Prezidente Repúblika ko’alia kona-bá relasaun nasaun rua nian. Saida mak ita halo ona no saida mak ita sei halo tan iha futuru”.
Vizita iha Timor-Leste durante loron tolu loron tolu no sei hala’o no envolve iha sorumutu nivel-altu ho ofisiál prinsipál sira iha Governu.
Vise Sekretária Estadu ne’e nia vizita mai Timor-Leste konsege hasoru malu ho Primeiru Ministru, Xanana Gusmão, Prezidente Ramos-Horta, Ministru Negósiu Estranjeiru no Kooperasaun (MNEK) Bendito Freitas, no Vise Ministra ba Asuntu ASEAN, Milena Rangel.
Iha oportunidade ne’e, Melissa A. Brown lori EUA nia naran kongratula Timor-Leste ba susesu adezaun ba Organizasaun Mundiál Komérsiu (OMK). Alende ne’e, EUA kontinua apoia Timor-Leste ba adezaun ASEAN hodi hametin liután relasaun bilateral, no esplora dalan foun ba kolaborasaun.
Adjunta ne’e hasoru malu ho Primeiru Ministru, Xanana Gusmão hodi hala’o diskusaun ne’ebé produtivu, troka perspetiva kona-ba Timor-Leste ninia prioridade ba dezenvolvimentu.
Reuniaun ne’e enfatiza Governu EUA nia kompromisu hodi apoia Timor-Leste ninia inisiativa dezenvolvimentu sira ho dalan adezaun ba ASEAN.
Durante reuniaun ho Prezidente Ramos-Horta, nia espresa gratidaun no rekoñese EUA nia kontribuisaun, sita kona-bá apoia ba Timor-Leste nia adezaun ba ASEAN, millaun $484 ba Millennium Challenge Corporation Compact, no hametin relasaun seguransa entre nasaun rua ne’e.
Jornalista: Hortencio Sanchez
Editór : Florencio Miranda Ximenes
