DILI, 12 marsu 2024 (TATOLI) – Ministru Defeza Kontra Almirante, Donaciano Gomes Pedro Klamar Fuik, hateten Ministériu Defeza, tinan-ne’e, fó prioridade ba konstrusaun infraestrutura militár no halo lejislasaun sira atu institusaun defeza sai di’ak liután.
“Tinan-ne’e ita foku ba iha infrastrutura militár sira liuliu konstrui baiirro foun ba militár sira no infraestrutura sira seluk ne’ebé mak durante ne’e ita-nia forsa sira uza, balun ne’ebé kondisaun aat, tanba ne’e, tinan oin halo foun fali no ba ida-ne’e agora iha hela prosesu dezeñu nia-laran, kuandu orsamentu sufisiente ita bele komesa konstrui”, Klamar Fuik dehan ba jornalista sira hafoin enkontru ho embaixadór ne’ebé rezide iha Jakarta Fabien Penone, iha ofísiu Ministériu Defeza, Fatuhada, tersa ne’e.
Nia rekorda, Governu anteriór halo konstrusaun bairro militár iha Metinaro no iha área seluk. Iha IX Governu Konstitusionál kontinua tau iha planu asaun, tanba ne’e, tinan ne’e hodi finaliza.
Governante ne’e akresenta, aleinde fó prioridade ba bairro militár, iha mós lejislasaun sira oinsá haree no halo revizaun ba lei sira iha instituisaun F-FDTL no Institituisaun Defeza atu bele fó biban halo dezenvolvimentu institusionál ho di’ak liu iha futuru.
“Tinan-ne’e nu’udar aranke governansaun da-sia nian, tanba ne’e, partikularmente, Ministériu Defeza nian iha tinan-ne’e mak sei foku liuba hadia uma laran liuliu koalia ho forsa armada Institutu Defeza Nasionál no Ministeriu Defeza liuhosi adia lei sira hodi insituisaun organiza aan di’ak liután”, nia konklui.
Jornalista: Natalino Costa
Editór : Zezito Silva
