DILI, 13 marsu 2024 (TATOLI)- Autoridade Nasionál Petróleu (ANP), foti asaun suspende temporariamente, hafoin simu informasaun kona-bá produtu lubrifikante ne’e deskonfia falsu faan iha merkadoria ho Marka Shell Advance 4T AX5 15W–40 ho númeru Batch 11871564100809DEC21 no Shell Advance 4T AX7 10W-40 ho númeru Batch 11816640100825AUG21 40 ne’ebé prodús no importa husi Indonézia.
“Daudaun ne’e ANP hala’o hela investigasaun no apela ba públiku atu temporariamente labele sosa produtu ho detallu ne’ebé mensiona to’o bainhira iha fali ona avizu husi parte ANP”, refere nota komunikadu ne’ebé Agência Tatoli asesu hosi Portal ANP, kuarta ne’e.
ANP kontinua garante seguransa ba kualidade lubrifikante ne’ebé importante tebes iha indústria petróleu nian.
ANP mós iha kompromisiu atu nafatin hasa’e sistema kontrolu ba kualidade lubrifikante ne’ebé importa mai Timor-Leste hodi garante konsumidor sira protejidu husi produtu falsu sira ne’ebé sei fo impaktu ladiak ba sira nia mákina veíkulu.
ANP sei fahe nafatin informasaun atualizada relasiona ho investigasaun no asaun ruma kona-bá lubrifikante refere.
TATOLI
