DILI, 13 marsu 2024 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova ona projetu dekretu-lei, ne’ebé aprezenta hosi Ministru Justisa, Sérgio de Jesus Fernandes da Costa Hornai, kona-ba Karreira Espesiál no Estatutu Guarda Prizionál.
“Hafoin dékada ida resin hosi kedas aprovasaun rejime jurídiku ba Karreira Espesiál no Estatutu Guarda Prizionál Timor-Leste, diploma ida-ne’e ho objetivu atu klarifika regra kona-ba kondisaun promosaun iha kuadru pesoál no fó dalan hodi esklarese dúvida sira ne’ebé difikulta ona ninia aplikasaun integrál,” refere nota ne’ebé Agência Tatoli asesu hafoin reuniaun ezekutivu ne’e, iha Palásiu Governu.
Notísia relevante : MJ submete ona estatutu Guarda Prizionál ba Gabinete PCM
Iha sorin seluk, lejizlasaun ne’e halo alterasaun ba komplementu remuneratóriu rejime salariál hodi konsidera hanesan saláriu baze, ho objetivu atu hadi’a estatutu remuneratóriu ba guarda prizionál sira.
Aleinde ne’e, bainhira atu simplifika, presiza estabelese tabela remunerasaun foun ida tuir kategoria karreira espesiál nian.
Alterasaun sira seluk mós introdús ona ba rejime jurídiku Karreira Espesiál no Estatutu Guarda Prizionál ho objetivu atu hadi’a serbisu Guarda Prizionál sira no klarifikasaun ba regra balun ne’ebé prevee.
Antes ne’e, Komisaun B ne’ebé trata asuntu Negósiu Estranjeiru no Defeza ho Seguransa, foti ona kestaun funsionáriu Guarda Prizionál ne’ebé hahú hala’o serbisu dezde tinan 2000 to’o agora nafatin mantein ho nível 2 ho 3. Nune’e, husu ba IX Governu Konstitusionál atu kria polítika ida ida hodi hasa’e nível Guarda Prizionál tanba sira presta serbisu kleur ona no hodi valoriza sira-nia serbisu.
Sira-nia avaliasaun dezempeñu hato’o ona ba Komisaun Funsaun Públika (KFP), maibé dalaruma asaun atu promove sai kestaun. Tanba ne’e Estatutu Guarda Priozionál ne’e importante atu valoriza serbisu sira iha estabelesimentu priozionál hanesan Becora, Gleno no Suai.
Jornalista : Antónia Gusmão
Editora : Julia Chatarina
