Embaixadór Boibat konvida antigu PM Taur partisipa festivál iha Saharauí

DILI, 14 marsu 2024 (TATOLI)–Antigu Primeiru-Ministru (PM), Taur Matan Ruak, kuarta ne’e, simu vizita hosi Embaixadór Árabe Saharauí iha Timor-Leste, Boibat Malainin, iha Rezidénsia Farol.
“Hasoru malu ne’e Embaixadór Saharauí hato’o konvite ida hosi Diretora Ezekutivu, Maria Carrion nian, lori povu Saharauí nia naran konvida Taur Matan Ruak hanesan antigu Prezidente Repúblika no antigu Primeiru-Ministru nu’udar konvidadu espesiál iha lansamentu Festivál Internasionál Sinema Sahara Osidental (FiSahara),” refere nota ne’ebé Agência Tatoli asesu hosi Gabinete antigu titulár, Taur Matan Ruak, kinta ne’e.
Notísia relevante : Taur apela ba timoroan hotu kontinua mantein pás no estabilidade
Lansamentu Festivál Internasionál Sinema Sahara Osidental ba dala-18 ho tema ‘Reziste mak manán’, ne’ebé mak sei realiza iha loron 29 abríl to’o 05 maiu 024, iha Kampu Refuziadu Saharauí nian iha sidade Tindouf, Argélia, besik iha fronteira ho país Mauritánia, Sahara Osidentál no Marrocos.
“Antigu Xefe Estadu sente onradu no agradese ba konvite refere no afirma sei arranja tempu hodi partisipa iha eventu refere,” nia akresenta.
Jornalista : Antónia Gusmão
Editora : Julia Chatarina

