SMSB sei implementa programa má-nutrisaun ba estudante sira iha Baucau
BAUCAU, 14 marsu 2024 (TATOLI) – Servisu Munisipál Saúde Baucau (SMSB) sei implementa programa má-nutrisaun ba estudante sira iha munisípiu Baucau.
Diretór Servisu Munisipál Saúde Baucau, Cristiano Cipriano Belo, esplika programa refere hanaran kontrola infeksaun lumbriga transmite hosi rai (STH, sigla inglés) ne’ebé serbisu hamutuk ho edukasaun munisípiu ho tarjetu ba estudante ensinu báziku primeru to’o terseiru siklu hosi idade 6 to’o 14.
“Ita hakarak hadi’a nutrisaun labarik estudante sira-nian, tanba estudante sira hetan má-nutrisaun ne’e fatór mai hosi lumbriga,” Diretór Servisu Munisipál Saúde hateten iha Vila Antiga, kinta ne’e.
Programa refere parte kontinuasaun hosi polítika Ministériu Saude (MS) ho Ministériu Edukasaun ho objetivu atu prevene labarik estudante sira hosi moras lumbriga.
Kondisaun infraestrutura eskola iha munisípiu Baucau seidauk sufisiente liuliu kondisaun sintina ne’ebé la ijiene inklui estudante balun sei halimar ho rai nune’e implika moras lumbriga.
Moras lumbriga hada’et liuhosi bainhira soe fo’er boot la uza sintina, la fase liman bainhira konsume hahaan, la utiliza xinelus ka sapatu bele tanba da’et hosi ain hodi halo kabun moras.
Síntoma ba moras lumbriga hanesan labarik laiha vontade halo atividade, tee-been, tee-oan metin, menus vontade haan, raan menus kauza ba kresimentu saúde labarik nian to’o má-nutrisaun.
“Kondisaun eskola balun la sufisiente nune’e fasil daet ba labarik sira liuhosi liman, ibun, hahaan no bee, entaun ho ida-ne’e mak ita halo advokasia ho dirijente edukasaun munisipál,” Cristiano Belo akresenta.
Saúde Baucau hamutuk ho edukasaun hahú implementa programa refere liuhosi halo advokasia iha nível munisípiu to’o postu administrativu nune’e fahe informasaun ba inan-aman estudante sira hafoin tama ba faze implementasaun iha nível eskola.
Saúde Baucau tuir planu sei fahe aimoruk prevensaun hanesan Albendazole 400mg hamutuk 33.515 ba totál estudante 30.515, hosi eskola ensinu báziku primeru to’o terseiru siklu hamutuk 284.
Jornalista : Natalino Belo
Editór : Evaristo Soares Martins
