ME husu diretór eskola halo jestaun labele prejudika prosesu aprendizajen
DILI, 17 marsu 2024 (TATOLI)–Ministériu Edukasaun (ME) liuhosi Dirasaun Ensinu Sekundáriu, Deolindo da Crus, husu ba diretór eskola iha territóriu nasionál atu halo jestaun ho loloos, nune’e labele prejudika fali prosesu aprendizajen ba estudante sira iha eskola.
“Diretór eskola sira tenke halo jestaun ba karga oráriu nian ho loloos, nune’e labele prejudika aprendizajen ba estudante sira. Ita prontu servisu hamutuk atu eleva kualidade edukasaun, liuliu ba prosesu aprendizajen ho di’ak. Ita forma ita-nian oan sira-ne’e ho kualidade no ho dignu,” nia hateten ba Agência Tatoli, iha nia kna’ar fatin, Vila verde, segunda ne’e.
Tanba ne’e, nia hato mensajen ba profesór sira iha territóriu nasionál liuliu hanorin iha ensinu sekundáriu no tékniku vokasionál, tantu públiku no privadu sira, atu hala’o kna´ar ho loloos hodi asegura prosesu aprendizajen ba estudante sira.
“Diretór eskola sira, halo jestaun kontrolu no monitorizasaun ne’ebé di’ak ba ita-nia oan sira. Ita-nia maluk profesór balun ne’ebé dala ruma iha situasaun balun la kumpre, husu no presiza hala’o kna’ar ho di’ak. Tenke koordena di’ak, atu nune’e labele prejudika ba ita-nia oan sira, tanba públiku sempre kestiona kona-ba prosesu aprendizajen, profesór balun la hala’o nia kna´ar,” nia dehan.
Profesór balun ne’ebé la kumpre kargu no orária ho loloos ne’e tenke fó atensaun ba nia tanba tuir loloos ne’e kada professór tenke kumpri ninia kargu orária oras 40 kada semana.
Adjuntu Diretór Eskola Sekundáriu Jerál (ESJ) 4 Setembru UNAMET Balide, Alexandre da Costa Belo, hateten profesór iha eskola ne’e la’o tuir regra ne’ebé mak iha durante ne’e.
“Ami-nia profesór sira iha ne’e hanorin tuir oras ne’ebé mak iha no sempre tuir dixiplina, tanba kada profesór la’o tuir aula oráriu ne’ebé mak iha,” nia hateten.
Diretór Eskola Ensinu Sekundáriu Tékniku Vokasionál (ESTV) 28 Novembru Becora, Manuel Amaral, dehan ESTV ne’e sempre la’o tuir regra ka karga orária ne’ebé mak iha.
“Durante ne’e ha’u-nia profesór sira hanorin dixiplina tuir duni karga oráriu ne’ebé fó sai hosi Ministériu Edukasaun, soke diferensa de’it mak ami Ensinu Sekundáriu Tékniku Vokasionál implementa sistema modulár katak bainihira profesór ida hanorin módolu ida hotu, halo kedas ona avaliasaun,” nia dehan.
Maibé, ba Ensinu Sekundáriu Jerál ne’e implementa ezame periodika, ne’ebé atu dehan de’it katak Eskola Tékniku Vokasionál (TEKVOK) ne’e hahú janeiru to’o agora prosesu aprendizajen la’o normál no di’ak tuir regra ne’ebé iha.
Jornalista : Osória Marques
Editór : Cancio Ximenes
