DILI, 19 marsu 2024 (TATOLI)–Eskola Ensinu Sekundáriu Jerál Prezidente Nicolau Lobato Soibada, munisípiu Manatuto, daudaun ne’e kontrata profesór na’in-lima (5) hodi hanorin matéria lima ne´ebé tama iha lista ezame nasionál.
“Tanba ita-nia matéria lima ne’ebé tama iha ezame nasionál hanesan matemátika, ekonómia, portugés, fízika, no dalen ingleza, ida-ne’e obriga ami no nesesidade duni atu ami kontrata profesór na’in-lima. Ida-ne’e, ami kontrata ona sira iha janeiru no agora sira hanorin daudaun,” Diretór eskola ensinu sekundáriu jerál Prezidente Nicolau Lobato Soibada, Joanico Ulha da Costa, hateten ba Agência Tatoli, liuhosi telefónika, tersa ne’e.
Maske iha tinan kotuk, Ministériu Edukasaun hasai ona sirkulár katak bandu eskola atu halo kobransa ba inan-aman no kontrata profesór, maibé nesesidade hosi estudante mak obriga no inan-aman konkorda hodi asina ona karta konkordánsia atu bele kontrata profesór sira hosi fó hanorin ba sira-nia oan sira.
Totál profesór iha Ensinu Sekundáriu Jerál ne’e hamutuk na’in-11 maibé profesór ida hakotu iis no hela ema na’in-10, no ema na´in-ida (1) ME mak termina tiha nia kontratu iha 2023, entaun hela profesór na’in-sia (9) de’it.
“Hosi númeru ne’e na’in rua (2) ba eskola TEKVOK no na’in-hitu (7) ba eskola sekundáriu jerál. Ida-ne’e la sufisiente, nune’e ha’u rasik tun ba hanorin inklui adjuntu, koordenadór no GAT. Ami tenke tun hanorin tanba profesór la to’o,” nia dehan.
Nia dehan, kona-ba kombransa ne’e parte eskola ko’alia ona ho inan-aman hodi kontribui osan kada fulan $5 atu selu profesór na’in-lima ba matéria ne’ebé tama lista iha ezame nasionál nian ne’e.
Tanba, ME hapara profesór matemátika nian no profesór ingleza nian mate tiha, entaun alternativu Prezidente Konsellu inan-aman hamutuk profesór hodi konkorda no deside kada fulan kontribui $5, no parte rua asina ona akta konkordánsia nune’e loron ruma ME halo inspesaun bele hatudu.
“Akta konkordánsia ne’e atu garante no sai prova ida ba ita hodi hatudu ba parte inspesaun. Ita-nia razaun ne’e tanba nesesidade estudante nian no garante kualidade edukasaun mak deside kontrata profesór ba matéria lima ne’e,” nia dehan.
Totál estudante iha eskola sekundáriu jerál ne’e hamutuk 122, inklui ona ho estudante TEKVOK 25 ho sala-de-aula neen (6), sala informátika no bibleoteka ida (1) no eskritóriu ho sala neen (6) ba profesór sira.
Jornalista : Osória Marques
Editór : Cancio Ximenes
