iklan

INTERNASIONÁL, DILI, HEADLINE

Xefe Estadu realiza palestra kona-bá mudansa klimátika

Xefe Estadu realiza palestra kona-bá mudansa klimátika

Imajen/espesial

DILI, 20 marsu 2024 (TATOLI) –Prezidente Repúbkika no Lauriadu Novel ba Pás, José Ramos Horta, organiza série Palestra Prezidensiál ba tinan 2024 kona-bá mudansa klimátika ho tema “Hamri’ik Hasoru Ameasa Klimátika,”.

“Palestra ida ne’e halibur hamutuk polítiku seniór sira, akadémiku, diplomata, parseiru dezenvolvimentu sira, reprezentante setór privadu no sosiedade sivíl sira atu hasa’e konsiénsia públiku kona-bát impaktu katastrófiku husi mudansa klimátika ne’ebé Timor-Leste hasoru no halo advokásia ba asaun klimátika iha setór hotu-hotu,” refere nota ne’ebé Agência TATOLI asesu hosi media Palásiu Prezidensiál Dili, kuarta ne’e.

Durante palestra, Prezidente Ramos Horta foka ba alerta husi mudansa klimátika, sensibilizasaun no asaun nesesáriu ba Timor-Leste.

“Nasaun ida ne’e esperiénsia rasik ona efeitu ladi’ak husi mudansa klimátika inklui produsaun agríkola ne’ebé menus, inseguransa  ai-han ne’ebé aumenta, falta bee, destruisaun infraestrutura, lakon vida no deslokasaun umanu”.

“Mudansa klimátika nu’udar katastrófiku globál ida-ne’ebé presiza resposta globál ida. Maibé nasaun ki’ik sira hanesan Timor-Leste labele hasoru dezafiu ezisténsia ida-ne’e mesak de’it. Ita presiza reforsa kooperasaun internasionál, transferénsia teknolojia, dezenvolvimentu kapasi no apoiu finanseiru atu aumenta reziliénsia, lori esforsu mitigasaun no adapta ba impaktu ne’ebé labele evita iha futuru.

Prezidente Horta agradese Governu Timor-Leste ba nia envolvimentu ativu iha prosesu negosiasaun ONU nian kona-bá mudansa klimátika hodi  defende interese no influénsia desizaun internasionál sira hodi kombate mudansa klimátika.

Nune’e, Xefe Estadu ezije Timor-Leste tenke toma medida iha dalan ba dezenvolvimentu hodi hamenus karbonu liuhusi promosaun enerjia renovavél, habelar inisiativa reflorestasaun, konservasaun jardín nasionál sira, no suporta programa florestál komunitária sira nian.

PR Horta subliña nesesidade ba estratéjia klimátika ida-ne’ebé koordenadu ho parte hotu-hotu iha Timor-Leste, ne’ebé envolve governu, parseiru dezenvolvimentu, sosiedade sivíl, akadémiku, setór privadu no komunidade sira atu promove sidade no infraestrutura sira ne’ebé reziliente ba klima iha nasaun laran tomak.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!