DILI, 21 marsu 2024 (TATOLI) – Formandu na’in-18 husi Diresaun Jerál Servisu Migrasaun, konklui ona formasaun ne’ebé fasilita hosi Home Affairs Austrália iha área jestaun ba risku sira no halo avaliasaun ba pasajeiru sira hodi bele haforsa jestaun no fó atedimentu di’ak iha postu fronteira territóriu nasionál tomak.
Xefe Setór Fronteira, Inspetór Polísia Agostinho da Costa, informa iha tinan ne’e hahú ho ema na’in-18, kompostu hosi feto nain-5 no mane nain 13 ne’ebé formasaun ne’e hala’o iha Sentru Formasaun Polísia Comoro (CFP).
“Ohin, ita konklui ona formasaun ne’ebé fasilita hosi Governu Austrália ba membru Migrasaun tantu hosi PNTL no Sivíl sira ne’ebé destakadu iha Postu Integradu Fronteira hotu,”
Formasaun ne’e fó kompenténsia liubá ofisiál migrasaun sira oinsá halo jestaun operasionál liuliu lei sira liga ba atendimentu públiku nian bainhira halo atuasaun iha tereñu.
“Ho formasaun ne’e garante teb-tebes ba ami nain-hira ne’ebé nu’udar ajente migrasaun ninian iha fronteira ne’ebá tanba siénsia ida ne’e ligadu kedas ho ami nia servisu lor-loron entaun bele mós loke nafatin ami nia hanoin atu ami bele halo atendimentu iha fronteira ho di’ak”, katak.
“Formasaun ne’e importante tebes tanba dalabarak ema tama ho dokumentu ilegál oinsa servisu migrasaun atu detekta falsifikasaun dokumentu depois ema halo sabotajem ruma oinsa Servisu Migrasaun bele detekta ho ekipamentus sira ne’ebé mak iha”.
Entretantu formasaun ida-ne’e ho sertifikadu internasionál no sai nu’udar parte ida hosi programa preparativu ba rekursu umanu ne’ebé kualifikadu no kontrola sistema foun ne’ebé instala ona iha pontu entrada Timor-Leste hanesan Sakato, Batugade, Suai no Dili rasik.
Biban ne’e, Xefe Setór husu nafatin ba Servisu Migrasaun Austrália hodi kontinua fó formasaun hodi bele intende di’ak liután prosesu servisu fronteira nian.
Iha fatin hanesan, Paul Young, ne’ebé sai mós hanesan formadór, hatete formasaun ne’e nia objetivu maka atu hasa’e membru sivíl no PNTL sira-nia kapasidade hodi deteta dokumentu falsu no fraúde iha postu fronteira tomak.
“Ami fó iha treinamentu durante loron tolu, iha ne’ebé ami iha péritu sira ne’ebé mai husi Austrália atu fahe koñesimentu balun kona-bá oinsá atu haforsa Migrasaun nia jestaun fronteira. Durante loron tolu nia laran ami haree liubá oinsa halo jestaun risku no avaliasaun ba pasajeiru sira, ezaminasaun dokumentu, halo komparasaun ba imajen sira no buat barak seluk tan ne’ebé kabe ba ofisiál migrasaun sira nia servisu”, peritu Migrasaun ne’e tenik.
Formadór ne’e kompromete sei kontinua halo kooperasaun di’ak ho Ministériu Interiór liuhusi Servisu Migrasaun hodi fo treiamentu barak liután, maibe nia laiha data fixu no konforme desizaun hosi Dirijente másimu Servisu Migrasaun no Ministériu rasik.
Jornalista: Hortencio Sanchez
Editór : Florencio Miranda Ximenes
