DILI, 27 marsu 2024 (TATOLI) – Deputy Commissioner Australian Federal Police (AFP), Lesa Gale, hateten, hakarak koopera ho Polisia Nasionál Timor-Leste (PNTL) hodi dezenvolve setór seguransa iha nasaun ne’e.
“Ohin, oportunidade ida ba ami hosi Australian Federal Police hasoru malu ho,,Prezidente Repúblika, José Ramos Horta, hodi ko’alia kona-ba halo kooperasaun ho Polísia Nasionál Timor-Leste hodi dezenvolve setór seguransa,” Lesa hatete ba jornalista sira iha Palásiu Prezidensiál, Bairru-Pité, Dili, kuarta ne’e.
Nia dehan, AFP prontu atu fó kapasitasaun rekursu umanu ka membru PNTL hodi hasa’e liután kualidade.
“Buat sira ne’e hotu mak ohin ami hasoru direta Prezidente hodi ko’alia, Prezidente apresia no husu Austraália atu apoiu Timor-Leste iha dezenvolvimentu rekursu umanu liuliu iha área seguransa nian,” nia hatete.
Rekorda fali katak, antes ne’e Formandu na’in 18 hosi Diresaun Jerál Servisu Migrasaun, konklui ona formasaun ne’ebé fasilita hosi Home Affairs Austrália hodi fornese formasaun kona-ba risk management no passengers assessment ba ofisiál no ajente hosi Diresaun Jerál Servisu Migrasaun (DGSM) hodi haforsa jestaun fronteira ida ne’ebé di’ak iha postu fronterisa territóriu nasionál tomak.
Formasaun ne’ebé fasilita husi Governu Australia ba membru Migrasaun tantu hosi PNTL no Sivíl sira ne’ebé destakadu iha Postu Integradu Fronteira hotu.
Ba tinan ida ne’e hahú ho ema na’in 18 kompostu husi feto nain lima no mane nain 13 hodi eleva tan sira nia kapasidade iha área jestaun risku no oinsa halo avaliasaun ba pasajeiru sira ne’ebé halo movimentu iha pontu entrada sira.
Formasaun ne’e fó kompentensia liu-bá ofisiál migrasaun sira oinsá halo jestasaun operasionál liu-liu lei sira liga ba atendementu públiku nian bainhira halo atuasaun iha terenu.
Importansia husi formasaun ne’e hodi eleva kapasidade membru Migrasaun tantu hosi PNTL no Sivíl nian nune’e bele halo ezaminasaun ba dokumentu no fraude iha postu fronteira tomak.
Entretantu formasaun ida-ne’e ho sertifikadu internasionál no sai nu’udar parte ida husi programa preparativu hodi prepara rekursu umanu ne’ebé kualifikadu no kontrola sistema foun ne’ebé instala ona iha pontu entrada Timor-Leste hanesan Sakato, Batugade, Suai no Dili rasik.
Notísia relevante: Komisáriu Faustino Husu AFP Kontinua Apoia PNTL
Jornalista: Hortencio Sanchez
Editór: Florencio Miranda Ximenes
