Reprezentante Governu husu MFK atua servidór Estadu utiliza veíkulu ba interrese privadu
DILI, 27 marsu 2024 (TATOLI)—Reprezentante Governu no Vise-Ministru Asuntu Parlamentár, Adérito Hugo da Costa, klarifika katak, IX Governu Konstitusionál seidauk halo alterasaun ba dekretu-lei kona-ba kriasaun subsídiu mensál transporte ba servidór Estadu sira.
Tanbe ne’e, nia husu ba Ekipa Monitorizasaun no Fiskalizasaun Konjunta (MFK) atu atua servidór Estadu sira ne’ebé utiliza veíkulu Estadu ba interrese privadu.
“Rejime ka dekretu-lei ida-ne’e sei kontinua tanba IX Governu seidauk halo alterasaun, ne’ebé subsídiu transporte ba kargu xefia sira kontinua nafatin. Maibé sira nafatin utiliza patrimóniu Estadu hanesan karreta, ne’e sira halo violasaun ba regra. Ne’ebé karik iha balun sei nakar, entaun entidade ne’ebé halo pasa revista mak hetan bele halo atuasaun no apreensaun hodi kontinua prosesa ba-oin,” Adérito Hugo da Costa, hateten iha Palásiu Governu, kuarta ne’e.
Antes ne’e, ekipa MFK nota katam servidór Estadu hanesan Diretór Jerál, Diretór Nasionál, no Xefe Departamentu sira kontinua utiliza veíkulu Estadu ba interrese provadu.
Ekipa MFK kompostu hosi Polísia Nasionál Timor-Leste (PNTL), Komisaun Antí-Korrupsaun (CAC, sigla portugés), Komisaun Funsaun Públika (CFP, sigla portugés) Inspesaun Jerál Estadu (IGE, sigla portugés), Diresaun Jerál Jestaun Patrimóniu Estadu-Ministériu Finansa (DJJPE-MF) no Diresaun Nasionál Transporte Terrestre (DNTT).
Notísia relevante : Servidór Estadu kontinua utiliza veíkulu ba interrese privadu
Regra ne’ebé fó sai bazeia ba dekretu-lei númeru 80/2022 kona-ba regulamentu viatura Estadu nian, dekretu-lei númeru 6/2003, 30 Abríl kona-ba kódigu estrada, sirkulár númeru 003/GPM/111/2009 kona-ba jestaun tékniku karreta Estadu, sirkulár númeru 001/GPM/X/2012 kona-ba kontrola movimentu viatura Estadu no padraun prosedimentu operasionál.
Bazeia ba baze legál hirak-ne’e, ekipa MFK aviza ba responsável lojístika no patrimóniu iha ministériu, institusaun Estadu, servisu fundu autonóma, autoridade munisipál no administrasaun munisipál hotu atu halo kontrolu másimu ba utilizasaun viatura Estadu diáriamente iha institusaun ida-idak tuir regra no prosedimentu neʼebé iha, maibé la inklui ba sira neʼebé autorizadu ona ho lei no dekretu-lei sira.
Jornalista : Antónia Gusmão
Editora : Julia Chatarina
