iklan

EDUKASAUN

Ezame períodu dahuluk: Estudante ESJ 4 Setembru tuur iha li´ur

Ezame períodu dahuluk: Estudante ESJ 4 Setembru tuur iha li´ur

Estudante Sekundariu Jerál 04 setembru, UNAMET, Dili. Imajen Tatoli/Dok.

DILI, 02 abríl 2024 (TATOLI)–Eskola Ensinu Sekundáriu Jerál (ESJ) 4 Setembru UNAMET Balide, Dili, menus saladeaula fó impkatu ba estudante sira tuir ezame períodu dahuluk tuur de´it iha saladeaula nia liur mak prienxe matéria ezame.

Notísia Relevante: ME hapara profesór kontratadu difikulta elaborasaun matéria ba ezame períodu dahuluk

Diretór Eskola Esinu Sekundáriu Jerál (ESJ) 4 Setembru UNAMET Balide, Martinho de Menezes, hateten iha ezame períodu dahuluk ne’ebé realiza iha segunda (01 abríl) ne´e estudante barak mak tuur iha li´ur mak tuir ezame.

“Defikuldade ne’ebé ami hasoru mak inundasaun ne’e, mak saladeaula ami labele uza ba ezame. Entaun, saladeaula ne’e ami uza fali biblioteka ninia. Depois saladeaula ida mak ami-nia estudante sira hala’o ezame iha li’ur, ida uza sala profesór sira-nian. Ida mak IT nian, ida tan mak ami sala laboratóroiu tanba ami-nia sala la sufisiente,” nia hateten ba Agência Tatoli, iha nia kna’ar fatin, Balide, tersa ne’e.

Totál estudante kuaze 2.980 ne’e fahe ba turnu rua, dadeer no lorokraik, profesór ne’ebé hanorin iha eskola ida-ne’e hamutuk 103, sala normál ne’e 26, maibé saladeaula ualu (8) mak afeta ba inundasaun, entaun labele uza ba iha prosesu ezame ninian.

Sekretáriu Estadu Ensinu Sekundáriu Jerál no Ensinu Tékniku Vokasionál (SEESJETV), Domingos Lopes Lemos, hateten rekoñese ESJ 4 Setembru UNAMET Balide sempre hetan difikuldade bainhira udan.

“Ita rekoñese saladeaula ualu iha eskola ensinu sekundáriu jerál 4 Setembru ne’e sempre hetan difikuldade bainhira udan,” nia dehan ba jornalista sira, hafoin halo abertura ba programa merenda eskolár, iha EBC Faról, segunda ne’e.

Governante ne’e dehan, ida-ne’e problema boot ida maibé saida mak ministériu edukasaun atu halo mak tempu badak sei normaliza fali, nune’e labele prejudika fali prosesu aprendizajen.

EJS 4 Setembru deve surat-tahan iha rentál emprime matéria ezame

Aleinde ne´e, Diretór Eskola Ensinu Sekundáriu Jerál (ESJ) 4 Setembru UNAMET Balide, Martinho de Menezes, hateten eskola tuir de’it orientasaun diretór servisu edukasaun Munisípiu Dili nian, entaun deve surat-tahan iha rental hodi emprime mat’eria ezame tanba osan konsensoens eskolár tarde.

“Ida-ne’e la’ós foin akontese maibé ne’e tinan-tinan sempre akontese. Tanba ne’e, deve rentál ne’e normál tanba osan konsensoens eskolár tarde. Ita-nia difikuldade ne’e mak folla ezame nian, ne’ebé ita deve iha rentál sira. Realidade hanesan ne’e duni tanba osan mak laiha. Tanba ida-ne’e mak ita halo, ita la’o tuir orientasaun diretór servisu edukasaun munisípiu Dili nian,” nia dehan ba Agência tatoli, iha nia kna’ar fatin Balide, tersa ne’e.

Ida-ne’e akontese, tanba antes ne’e diretór eskola sira hotu hala’o ona enkontru ho diretór servisu edukasaun Munisípiu Dili, katak bele ba foti sásan iha rentál, bainhira osan tama mak selu fali.

“Ida-ne’e buat ida-ne’ebé normál ona. Tanba kuandu eskola iha territóriu nasionál, ida mak envia tarde relatóriu mak sei afeta eskola hotu-hotu,” nia dehan.

Adjuntu diretór ESJ 4 Setembru, UNAMET, Alexandre Belo, triste tanba Sekretáriu Estadu Ensinu Sekundáriu Jerál no Ensinu Tékniku Vokasionál, dehan eskola lahatene jere enkuantu osan konsensoens eskolár de’it seidauk tama.

“Osan konsesoens eskolár tarde hodi afeta ba imprime matéria ezame nian. Agora horiseik Sekretáriu Estadu dehan eskola mak lajere ho di’ak. Osan ba tinan ne’e de’it seidauk tama, oinsá makita jere. Agora, Sekretáriu Estadu dehan fali osan konsensoens eskolár tinan kotuk nian uza ba tinan kotuk la’ós mai tinan ida-ne’e,” nia esplika.

Totál estudante iha ESJ ne’e hamutuk 2.982, agora elaborasaun matéria ba estudante désimu terseiru ne’e hamutuk 12, ba désimu primeiru no segundu 13, entaun ida-ne’e presiza osan boot.

Tanba ne’e, nia sujere atu haruka osan konsensoens eskolár mai eskola ne’e sedu ka molok realiza ezame, nune’e labele deve osan iha rental.

Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, subsídiu eskolár ka konsensoens eskola seidauk ne’e loos maibé sira mós tetu katak osan konsensoens eskolár ne’ebé fulan ikus tinan 2023 nian ne’e, estoke sura-tahan sei to’o hela, maibé estudante iha eskola 4 Setembru UNAMET barak entaun sira uza hotu tiha, presiza haree didi’ak ida-ne’e.

Tuir Sekretáriu Estadu katak, tuir loloos sira la deve tanba iha fulan ikus tinan 2023 ne’e ME atribui osan $2 ba kada estudante rihun ida-resin ne’e, iha fulan ida-rua ne´e ezekuta hotu, ne’e imposivél.

“Kada eskola tenke haree nia jestaun di’ak, liuliu ezekusaun orsamentu eskolár nian. Ida-ne’e parte inpesaun eskolár sei halo haree,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!