DILI, 03 abríl 2024 (TATOLI)—Ministériu Edukasaun (ME) liuhosi Diretór Nasionál Ensinu Sekundáriu Jerál, Benjamin Fernandes, husu jerenta Eskola Ensinu Sekundáriu Jerál (ESJ) no eskola Ensinu Sekundáriu Tékniku (TEKVOK) atu aselara trata dokumentu ba konsensoens eskolár.
Notísia Relevante: Ezame períodu dahuluk: Estudante ESJ 4 Setembru tuur iha li´ur
“Ha’u husu eskola sekundáriu jerál no tékniku vokasionál inklui eskola privada sira atu aselera trata dokumentu, nune’e bele atribui konsensoens eskolár. Konsensoens eskolár ne’e, eskola sekundáriu jerál ho tékniku vokasionál sei presiza loke konta bankária, ba kada eskola iha territóriu, eskola lae ona. Uluk sira iha konta bankária, entaun ami sei trata konta bankária foun no entrega ba mak foin atribui orsamentu ne’e,” Diretór Nasionál Benjamin hateten ba Agência Tatoli, iha nia kna’ar fatin, Vila Verde, kuarta ne’e.
Nia reforsa, presiza dokumentu ne´e atu bele submete ba finansa nasionál hafoin loke konta bankária no fó númeru konta ba sira hodi foti osan no ezekuta ba atividade eskola nian hanesan sosa folla ezame no lapijeira sira atu uza.
Antes ne´e, ministériu edukasaun haruka ba konta munisípiu sira-nian, depois manda ba konta eskola nian maibé agora ne´e lae ona, tanba orsamentu ba konsensoens eskolár ne’e liuhusi fali transferénsia públiku no uluk osan iha konsensoens eskolár nian hamutuk item 670.
“Ita-nia orsamentu ne’e hosi transferénsia públiku mak nia tenke tama direta ba konta eskola nian, entaun presiza dokumentu referidu ne’e. Ida-ne´e sei asina husi ema balun, na’in tolu ne’ebé servisu iha eskola referida, hafoin bele atribui osan,” nia dehan.
Diretór Nasionál Ensinu Sekundáriu Jerál ne’e mós preokupa tanba konsensoens eskolár ne’ebé Ministériu Edukasaun atribui ba eskola iha territóriu ne’e iha 10 dezembru 2023, entaun ida-ne’e bele dehan sei iha folla ba matéria ezame nian.
“Tanba ita sosa folla ezame ne’e seidauk kle’ur, tanba ita atribui 10 ba leten fulan-dezembru 2023. Ha’u hanoin folla sei iha tanba folla ne’e ita rai to’o tinan rua hanesan ne’e, nia la aat ida no sosa mós lapizeira. Depois feriadu kle’ur iha dezembru mai janeiru, ne’e siginifika eskola mak seidauk hatene didi’ak jere osan,” nia dehan.
Totál osan ne’ebé atribui ba eskola iha territóriu hamutuk miliaun ida-resin (miliaun $1-resin).
Iha fatin seluk, Diretora Eskola Bázika Sentrál (EBC-sigla portugés), Filomena Freitas, preokupa ho konsensoens eskolár tanba tama tarde no eskola tenke deve folla iha empreza.
“Kona-ba konsensoens eskolár ne’e, ami ho Empreza Mitra asina akordu mak foin ita imprime matéria ezame, bainhira osan konsensoens eskolár sai ona mak devolve tanba Empreza Mitra mak durante ne’e ami koordena malu,” nia dehan.
Nia dehan, osan konsensoens eskolár ne’e tinan ida envia dala rua kada fulan neen, maibé ezame períodu datolu, entaun atu dehan katak Sekretáriu Estadu Ensinu Sekundáriu Jerál no Ensinu Tékniku Vokasionál, hateten jere osan ne’e oinsá enkuantu Ministériu Edukasaun (ME) envia tarde.
“Osan ne’ebé ami halo imprime ba matéria ezame ne’e hamutuk $2.153,75,” nia hateten.
Jornalista : Osória Marques
Editór : Cancio Ximenes
