iklan

EDUKASAUN

OJE 2024: ME ezekuta ona 21% iha trimestre dahuluk

OJE 2024: ME ezekuta ona 21% iha trimestre dahuluk

Osan Dólar Amérika. Imajen/Espesiál

DILI, 05 abríl 2024 (TATOLI)–Diretora Jerál Administrasaun no Finansa iha Ministériu Edukasaun (ME), Cecília Assis, hateten iha trimestre dahuluk (janeiru-marsu) ne’e ME ezekuta Orsamentu Jerál Estadu (OJE) 2024 atinje ona 21%.

“Hosi totál orsamentu alokadu $114.943.289, hahú janeiru to’o 4 marsu 2024, Ministériu Edukasaun ezekuta ona 21% ho ekivalente $23.638.693,63”, Cecília Assis dehan ba Agência Tatoli, iha nia knaar fatin, Vila Verde, sesta ne’e.

Diretora Jerál ME, hatautan katak iha balansu orsamentu ne’e hamutuk $90.003.506,32, atuál ba saláriu no vensimentu ezekuta $18.905.233.52.

“Ida-ne’e ita ezekuta barak tanba Ministériu Edukasaun nia funsionáriu iha territóriu kuaze 17.000, profesór hamutuk 14.000 no restante funsionáriu. Entaun saláriu funsionáriu ita hasai fulan ida millaun $5-resin,” nia dehan.

Ba trimester daruak, nia dehan, kontinua de’it planu programa no atividade ne’ebé ME iha, agora kona-ba projetu ne’e ME hasai osan hosi transferénsia públiku no halo akordu ho komunidade no autoridade lokál sira, projetu ne’ebé atu halo iha munisípiu, ida-ne’e maihosi tinan 2021 ho 2022 nian.

“Ami daudaun ne’e iha osan millaun $5 hosi osan kapitál dezenvolvimentu nian. Ne’ebé, ita sei selu millaun $2 ba projetu komunitária tinan kotuk nian, no dala ruma iha eskola balun tinan ida mós seidauk hotu entaun ita tenke halo retensaun. Ba miliaun $3 ne’e, ita sei halo eskola 21 iha tinan 2024. Planta no Kadernu Enkargu Bill of Quantiry/BoQ, ita prepara hotu ona no semana rua tan ita bele loke prosesu konkursu públiku,” nia dehan.

Orsamentu Jerál Estadu (OJE) 2024 ba Ministériu Edukasaun (ME) hamutuk $114.943.286, ne’ebé aloka ba saláriu no vensimentu $87.431.460, bens servisu $439.854, transferénsia públiku $9.257.278, kapitál menór $1.818.693, kapitál dezenvolvimentu millaun $5, komitmentu $1.301.086.05 (1%), obligasaun $4.479.292.49 (4%) no atuál $19.159.401.14 (17%).

Jornalista : Osória Marques

Editór       : Cancio Ximenes

 

iklan
iklan

Leave a Reply

iklan
error: Content is protected !!