Jerente eskola ESJ 4 Setembru Balide rekomenda ME konstrui moru protesaun
DILI, 08 abríl 2024 (TATOLI)—Adjuntu Diretór Eskola Ensinu Sekundáriu Jerál (ESJ) 4 Setembru UNAMET Balide, Alexandre da Costa, rekomenda ba Ministériu Edukasaun atu konstrui moru protesaun eskola hodi evita komunidade halo movimentu ba-mai iha resintu eskola ne’e.
“Ambiente eskola 4 Setembru UNAMET ne’e la kontribui atu garante kualidade edukasaun ensinu prosesu parendizajen, tanba konsentrasaun alunu ba matéria mak susar. Nune’e, ha’u rekomenda ba Ministériu Edukasaun atu halo moru protesaun ba eskola hodi evita estrundu iha eskola,” Jerente ne’e hateten ba Agência Tatoli, iha nia kna´ar fatin, Balide, segunda ne’e.
Tuir nia, komunidade ne’ebé hela rabat iha resintu eskola ne´e iha xefe familia tolu ka haat maibé iha ambiente eskola ne’e iha parte kotuk ema kuaze aldeia ida mak hela, ida-ne´e perturba tanba sira tama-sai iha arredór eskola, halo profesór no estudante la atensaun ba hanorin no simu matéria.
“Labarik sira lori sásan ba hamriik iha janela eskola nian, to’o iha balun ne’ebé tama to’o aula laran. La’ós ida-ne’e de’it maibé iha balun ne’ebé hela iha laran ne’e, lori mikrolete no taxi para iha ambiente eskola nian, to’o mikrolete ida para iha varanda eskola nian,” nia dehan.
“Ida-ne’e ha’u rasik hasee dala rua ka tolu ona maibé ema la komprende no halo beibeik. Entaun, Ministériu Edukasaun mak tenke toma atensaun no halo protesaun moru hodi evita komunidade tama-sai arredór eskola nian,” nia hateten.
Kestaun ida-ne’e estrutura eskola aprezenta ona ba parte relevante maibé seidauk iha resposta ba asuntu ne’e. Parte eskola aproxima ona ho komunidade hodi esplika ba sira katak ida-ne’e ambiente eskola nian, nune’e bainhira prosesu aprendizajen la’o hele, labarik sira tenke hakmatek no labele halo movimentu maibé hetok aumenta estrundu hanesan iha merkadu laran.
“Problema la’ós ida-ne’e de’it. Kanu bee nian dalaruma estraga hotu, ita la duun ba ema ida tanba estudante ho komunidade kahor malu, ita lahatane sé mak estraga. Tanba ne’e, liuhusi mídia husu ministériu edukasaun buka mekanismu no polítika ida oinsá halo moru protesaun. ESJ 4 Setembru enfrenta problema barak, kona-ba farda, bibleoteka, laboratóriu, saladeaula no konsensoens eskolár,” nia dehan.
Totál estudante iha ESJ 4 Setembru UNAMET 2.800-resin no profesór hamutuk 103.
Okupante resintu Eskola ESJ 4 Setembru UNAMET, Berta do Rego, hateten prontu koopera ho Governu atu husik hela fatin ne’e.
“Ami bele husik mamuk fatin ne’e maibé presiza konsidera ami tanba ami iha ne’e kle´ur ona, dezde 1999 to’o agora. Ami hela iha ne’e tanba ha’u-nia katuas-oan servisu iha Ministériu Edukasaun,” nia hateten.
Berta do Rego hatutan, iha arredór eskola ne’e komunidade barak la’ós sira mesak de’it maibé nia parte hein de´it desizaun husi Governu bainhira hateten sai ne´e nia parte pronto atu koopera.
Jornalista : Osória Marques
Editór : Cancio Ximenes
