iklan

EDUKASAUN

Eskola ESJ 10 Dezembru Comoro la realiza ezame matéria jeolojia-portugés

Eskola ESJ 10 Dezembru Comoro la realiza ezame matéria jeolojia-portugés

Escola Ensino Basico Central 10 Circlo Dezembru.

DILI, 09 abríl 2024 (TATOLI)—Diretór Eskola Ensinu Sekundáriu Jerál (ESJ) 10 Dezembru Comoro, Martinho Corsino, hateten iha ezame períodu dahuluk ne’e ESJ 10 Dezembru Comoro la realiza ezame ba matéria jeoloji-portugés tanba profesór laiha.

“Profesór ensinu ba matéria rua ne´e mak laiha. Tanba ne’e, iha ezame period dahuluk ne´e ami labele fó notas ba estudante sira. Tanba, ami la’o tuir sirkulár ministériu edukasaun nian katak profesór ne’ebé kontratu ramata iha 31 dezembru 2023, ne’e la hanorin ona. Entaun, ida-ne’e la’ós ha’u-nia kompeténsia maibé ministériu edukasau nia kompeténsia atu halo oinsá,” nia dehan ba Agencia Tatoli, iha nia kna’ar fatin Comoro, tersa ne’e.

Nia dehan, sei la fó notas ba estudante kuandu laiha ensinu aprendizajen ba sira-ne´e sé mak brani atu fó valor ba estudante siea no oinsá mak bele fó ezame ba sira.

“Iha 6 marsu, tékniku hosi kurríkulu nasionál halo enkontru ho ami, fahe hela grella avaliasaun ba ami, ha’u rasik husu sira iha momentu ne’ebá katak sira tenke jere. Maibé, sira dehan sira-nia limitasaun ka sira-nia kbiit laiha. Entaun, ha’u dehan ba sira halo sirkulár ida tun mai para valór ne’ebé laiha ne’e ami bele fó valór ba sira katak liuhosi traballu balun. Maibé sira nafatin dehan labele, entaun ha’u lakohi bosok ha’u-nia aan no ema seluk katak manorin laiha ha’u fó notas de’it, ne’e labele,” nia esklarese.

Tanba ne’e, eskola ESJ 10 Dezembru Comoro ejize ME atu halo rekrutamentu lalais hodi labele prezudika fali ezame ba periodu daruak, labele abandona no ba labarik nia valór. Daudaun ne’e profesór portugés na’in-rua de’it no ida seluk idade sa’e ona 60 no labele obriga atu ativa iha prosesu aprendizajen.

Totál estudante hamutuk 1.464 ho profesór iha 65. Ida-ne’e sei menus kuandu ko’alia kona-ba espesialidade. Entaun, iha eskola ne’e diretór, GAT, adjuntu hanorin hotu maibé la to’o nafatin. Tanba ne’e, ESJ ne’e presiza tan profesór ida ba jeolojia no na’in-haat ba portugés nian.

Entretantu, iha fatik ne´ebé lahanesan, Adjuntu Diretór Eskola Sekundáriu Jerál (ESJ) 4 Setembru UNAMET Balide, Alexandre da Costa, hateten eskola ne’e fó tempu ba estudante ne’ebé seidauk ezame.

“Ami fó tempu ba estudante ne’ebé la tuir ezame tanba iha problema asidente iha dalan, iha moras no estudante sira-ne’ebé foin lalais polísia kaer ba sela, ne’e hahú ohin, aban no bainrua,”  nia dehan.

Hosi kestaun ne’e hotu, nia dehan, depende estudante hato’o nia karta maibé la’ós matéria hotu-hotu maibé iha balun de’it mak la tuir. Agora ba estudante ne’ebé polísia detein ne’e matéria rua iha loron sesta, ikus nian mak desportu no língua tetún.

Diretór Jerál Edukasaun Pre-Eskolár, Ensinu Báziku no Ensinu Rekorente, Apolinário Serpa Rosa, hateten eskola ne’ebé la realiza ne’e primeiru no segundu siklu, tuir kurrikulér eskolár nian katak la halo prova periodika, maibé halo de’it avaliasaun kontinua iha presesu aprendizajen loro-loron nian.

“Ida-ne’e akontese iha Eskola Ensinu Báziku Filiál (EBF) Ucecai, Suai nian de’it no munisípiu seluk laiha. Agora eskola bázika ida tan iha Manatuto nian mak altera ezame iha loron ida de’it tanba estudante partisipa iha vizita Bispu nian fatin ne´e. Entaun sira segunda mak remata, loloos ne’e ohin,” nia hateten.

Diretór Nasionál Sekundáriu Jerál, Benjamin Fernandes, hateten eskola ESJ hotu-hotu hala’o hotu ona ezame maibé iha matéria balun ne’ebé seidauk tanba profesór moras, ne’e iha maibé fila-fali ba diretór eskola sira oinsá atu jere nune’e estudante bele ezame.

Nia dehan, to’o agora ME seidauk simu relatóriu kona-ba eskola balun iha territróriu la ezame, ida-ne’e laiha duni no iha mak matéria balun mak la realiza tanba profesór laiha.

“Tuir informasaun ne’ebé ha’u simu katak iha Eskola Sekundáriu Jerál (ESJ) 10 Dezembru Comoro mak laiha maibé diretór eskola mak jere,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!