ME presiza tau atensaun ba fasilidade eskolár-profesór menus iha Pre-Eskolár
DILI, 11 abríl 2024 (TATOLI)—Inspetora Eskola Pre-Eskolár munisípiu Viqueque, Angelina da Costa, husu ba Ministériu Edukasaun (ME) atu haree problema ne’ebé pre-eskolár sira hasoru, hanesan menus karteira eskolár no profesór pre-eskolár menus.
“Iha ami-nia inspesaun durante ne’e nia rezultadu mak Pre-Eskolár Fatudere no Cacatualugasa, eskola seluk mak menus profesór, entaun loron ida iha aula no loron ida laih aula,” nia hateten ba jornalista sira, hafoin partisipa formasaun kona-ba ‘Sensibilizasaun no Introdusaun Prosedimentu, Padraun lisensiamentuno Formatu Vistória Dijitál, Garante Ambiente Saudável, Seguru no Estimulamente ba Labarik’ iha Tower Fatuhada, kinta ne’e.
Inspetora ne´e hatutan, pre-eskolár ne’ebé seidauk hetan karteira eskolár mak Pre-Eskolár Cairua, Unidus Aimanas-Rai, Sagrada Coração de Jesus Nuu Laran, no Eskola Pre-eskolár Aimanas Rai ne’e, empresta fali kadeira meza husi Pre-Eskolár Haburas Welolo mak foin uza.
“Ida-ne’e mak durante ne’e ami halo inspesaun iha terrenu, ne’ebé identifika problema iha pre-eskolar sira mak merenda eskolár, karteira eskolár laiha, nune’e mós menus profesór. Problema ne’ebé ami detekta iha eskola mak merenda eskolar, merenda eskolar ne’e ladún favorese tanba uluk ne’e ba pre-eskolár nia osan tama iha ensinu báziku nia konta bankária depois koordenadór ba foti osan mak eskola ne’e jere rasik, maibé ba tinan ida-ne’e merenda eskolar tama iha Ekipa Jestaun Programa (EJP), ne’ebé EJP mak foti osan depois mak entrega ba fornesedór sira jere,” nia hateten.
Relasiona ho merenda eskolár, Inspetora aproxima ona ho diretór eskola sira hodi konfirma formatu merenda eskolár nian. Maibé profesór sira dehan períodu ida-ne’e Pre-Eskolár hetan osan hira mós sira lahatene ho loloos iha eskola tanba sira lahatene osan hira mak sira jere.
Nia dehan, durante halo inspesaun ne’e mós iha problema ne’ebé inspetora sira hasoru mak motorizada laiha no mina kupon laiha.
“Primeiru problema ne’ebé ami hasoru mak laiha motorizada tanba distánsia dook. Iha tinan ida-ne’e motorizada mai ami inspetora Pre-Eskolár laiha, Antes ne’e iha maibé tama hotu ona ba lelaun, nune’e mós kupon mina ami laiha hodi fó apoiu mina ba ami hodi tun terrenu ne’e husi parte Hands de’it. Tanba ne´e sujere ba Ministériu Edukasaun tau mós atensaun,” nia dehan.
Problema hirak ne’e, nia hateten, sei la hamate sira-nia vontade servisu no la sai hanesan barreira ida atu hamate sira-nia dedikasaun iha baze.
“Husu ba Ministériu Edukasaun atu haree mós ba asuntu ida-ne’e, nune’e sira bele hala’o servisu ho di’ak iha terrenu tanba distánsia dook.
Pre-eskolár iha munisípiu Viqueque hamutuk 37 ne´ebé kompostu husi pre-eskolár públiku 28, restante katólika,” nia dehan.
Ho preokupasaun Inspetora Munisípiu Viqueque, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hatán, motorizada ME lansa ona iha semana kotuk no hein sei to’o fatin.
“Kona-ba motorizada ne’e ita lansa ona maibé ida-ne’e mós presiza prosesu mak foin to’o iha munisípiu”, nia hateten.
Jornalista : Osória Marques
Editór : Cancio Ximenes
