Estudante Fakuldade Diretu husu MESSK kontrola estrutura UNTL
DILI, 12 abríl 2024 (TATOLI)–Estudante Fakuldade Direitu iha Universidade Naciobal Timor Lorosa’e (UNTL), ezije ba Ministériu Ensinu Superiór Siénsia no Kultura (MESSK) atu halo kontrolu másimu ba órgaun ka estrutura UNTL.
“Tanba, laiha diálogu efetivu ho estudante hotu-hotu ne’ebé hamahon-aan iha fakuladade direitu, ligadu ba dosente asistente ne’ebé fó aula teória no prátika. Ami hakarak kontesta katak lei rasik mak permite ba dosente titulár atu permite ba asistente sira hodi fó aula ka dezempeña funsaun idéntiku ho mestre, ne’ebé previstu iha artigu 10. Tuir Dekretu-Lei Nu. 62/2022, ne’ebé halo ona 3º alterasaun ba dekretu-lei nú. 7/2011 kona-ba estatuto da carreira docente universitário,” Portavós Estudante Direitu, José da Costa, hateten iha konferénsia imprensa, iha resintu sentrál UNTL, sesta ne’e.
Portavós ne´e hateten, deklarasaun ne’ebé sira hato’o ne´e indiretamente fó kulpa ba sujeitu ka dosente balun de’it, maibé la konsege haree problema ne’e to’o nivel institusionál ka nia totalidade husi problema ne’e rasik liuliu iha fakuldade dreitu.
“Maibé, tuir ami-nia investigasaun, problema ne’ebé akontese interna iha fakuldade direitu nian, la’os kulpa ba individu dosente ida nian, hanesan saida mak sira deklara. Maibé, problema ne’e abut loloos integradu direta ho má jestaun administrativa UNTL liuliu iha ekipa reitoriál neʼebé lidera hosi Magnifiku Reitór ho nía estrutura ne’ebé halo nia funsaun la ho di’ak hanesan: Vise-Reitór Asuntu Akadémiku no Garantia Kualidade, Vise-Reitór Asuntu Administrasaun, Finansas no Administrasaun Jerál, Pro-Reitór ba Asuntu Planeamentu, Monitorizasaun no Avaliasaun, Pro-Reitór ba Asuntu ba Inspeksaun, Auditóriu no Kontrolu ba Kualidade,” nia dehan.
Tanba, efeitu husi má jestaun ne’e nia implikasaun mak hamosu problema hirak-ne’ebe fakuldade direitu enfrenta, hanesan falta dosente permanente no kontratadu, inkumprimentu ba kalendáriu UNTL no mós problema sira seluk tan.
“Husi ami-nia investigasaun, problema hirak-ne’e nu’udar kestaun jerál ne’ebé fakuldade hotu-hotu enfrenta iha UNTL. Husi problema hirak-ne’ebé mensiona iha leten, ami estudante ativu husi fakuldade direitu, hakarak ezije ba reponsável másimu UNTL hanesan Magnifiku reitór ho nia estrutura tomak hodi tomak medida adekuadu atu rezolve problema hirak-ne’e iha tempu badak. Tanba ne’e, ami hakarak ezije ba Ministériu Ensinu Superiór atu halo kontrolu másimu ba nia orgaun tutelar UNTL tanba hafoin ami aprezenta deklarasaun ba apresiasaun no kontestasaun hasoru deklarasaun husi asosiasaun fakuldade direitu nian ne’ebé sita iha leten,” nia dehan.
Ho preokupasaun sira-ne’e, portavós husu ba asosiasaun fakuldade direitu, atu labele foti konkluzaun laho investiga ne’ebé kle’an hodi fó kulpa pesoál dosente sira.
“Sujere ba estudante fakuldade direitu atu valoriza no dignifika dedikasaun dosente sira-nian ne’ebe durante hanorin ita maske iha má jestaun husi ekipa reitoriál UNTL. Sujere ba mós asosiasaun estudantil fakuldade direitu atu hatuur nia pozisaun ho loloos ba reprezentasaun estudante hotu-hotu,” nia dehan.
Tanba ne’e, husu ba estudante no dosente akadémika atu sai lian ida hodi ezije ba UNTL atu interven lalais hodi solusiona problema ne’ebé fakudade direitu enfrenta tinan barak.
“Ami hakarak enkoraja nafatin ba pesoál dosente permanente, kontratadu inklui dosente voluntáriu atu mantein ka hatudu nafatin profisionalizmu nu’udar dosente ne’ebe durante ne’e hanorin ami. Ami estudante ativu husi Fakuldade de Direito halo komunikadu imprensa ida-ne’e ho objetivu atu hatu’ur loloos problema ne’ebé akontese problema iha fakuldade direitu,” nia dehan.
Jornalista : Osória Marques
Editór : Cancio Ximenes
