Bartolomeo-Ovidio konfirmadu kompete Shouts East Asian Karate Championship Thailandia
DILI, 15 abríl 2024 (TATOLI) – Sekretáriu Jerál Federasaun Karate-do Timor-Leste (FKTL), António Carlos de Araujo, informa, atleta na’in rua husi modalidade Karate-do Bartolomeu Fátima Araujo Lay no Ovidio da Conceição Reis konfirmadu semana oin aranka ba Thailandia hodi kompete iha Shouts East Asian Karate Championship.
“Ita-nia atleta na’in rua semana oin 22 abríl arranka ba Thailandia hodi tuir kompetisaun Shouts East Asian Karate Championship ne’ebé sei hala’o 24-26 abríl tinan ne’e. Ita-nia atleta nia dokumentu preparadu ona sira hein arranka iha 22 abríl agora,” António katak ba Agência TATOLI iha Jináziu Dili, segunda ne’e.
Nia dehan, kona-ba jogu ne’e FKTL no Komite Olímpiku Nasionál Timor-Leste (CONTL-sigla portugés) no atleta nia família mak apoiu orsamentu tanba parte FKTL submete proposta ba Governu Ministériu Juventude Desportu Arte no Kultura (MJDAK) maibé la aprova.
“Atleta sira ba ne’e federasaun ho CONTL hamutuk ho familia mak tau osan hodi responde ba konvite ne’ebé mai husi Thailandia. Ita hato’o ona proposta ba Governu maibé labele aprova tanba dehan osan laiha entaun ami tau rasik osan, ida ne’e hanesan kontribuisaun ida ami halo hodi dezenvolve ita-nia atleta sira nia talentu,” nia katak.
Totál orsamentu ne’ebé parte tolu tau hamutuk montante hira Sekretariu Jerál ne’e la fó sai ba públiku tanba konfidensiál entre parte tolu.
“Osan ne’ebé CONTL fó hodi hola atleta na’in ida nia billete no taka viza, atleta ida fali ne’e federasaun ho inan-aman atleta nian mak responsabiliza. Montante hira mak ami tau hamutuk ne’e la presiza fó sai ba públiku tanba ne’e inisiativa husi ami, osan sira ne’e hola billete no osan bolsu ba atleta sira,” nia hatete.
Durante jogu atleta Bartolomeu sei kompete iha menus kilograma 60. Ovidio sei kompete iha menus kilograma 55.
Jornalista: Hortencio Sanchez
Editór: Rafael Ximenes de A. Belo
