JAKARTA, 16 abríl 2024 (TATOLI) – Ajénsia Notisioza Timor-Leste-TATOLI, tersa ne’e asina akordu kooperasaun kona-bá konverjénsia jornalístika ho Ajénsia Notisioza Repúblika Indonézia nian, ANTARA NEWS iha kapitál Jakarta.
Objetivu prinsipál husi akordu ne’e kontinua hametin kooperasaun ne’ebé la’o dezde 2017 no 2019 iha área jornalizmu nian no asina tan akordu kontinuasaun iha área jornalizmu nian.
Iha serimónia asinatura ne’e asina hosi Prezidente Ajénsia TATOLI, Manuel Pinto no Diretór Teknolojia Komersiál, Dezenvolvimentu Emprezarial no Teknolojia Informasaun ANTARA NEWS, Jaka Sugiyanta, iha salaun Heritage Center ANTARA, Jakarta Sentrál. Iha serimónia asina akordu ne’e partisipa mós hosi Prezidente Konsellu Administrasaun RTTL, José António Belo.
Konteúdu hosi akordu ne’e parte rua konkorda atu implementasaun Edukasaun no Formasaun ba Produsaun Jornalizmu iha 2024.
Sekretáriu Estadu Komunikasaun Sosiál, Expedito Dias Ximenes, ne’ebé sasin ba akordu ne’e hein katak kooperasaun ne’e kontinua nafatin nune’e ANTARA bele apoia kapasitasaun ba jornalista no editór sira husi Tatoli tanba ANTARA nu’udar mídia ofisiál Estadu Indonézia nian, ne’ebé kleur ona eziste.
“Ha’u lori Governu Timor-Leste nia naran, ha’u hakarak agradese ba imi-nia kooperasaun,” Sekretáriu Estadu Komunikasaun Sosiál akresenta.
Expedito espera akordu entre ajénsia notisioza rai rua nian bele hasa’e koñesimentu jornalista no editór sira iha futuru.
Prezidente Konsellu Diretivu Ajénsia TATOLI.IP, Manuel Pinto, hateten, TATOLI presiza duni ANTARA nia tulun tanba TATOLI sei joven, enkuantu ANTARA iha esperiénsia barak.
Tanba ne’e, TATOLI presiza duni ajuda husi ANTARA atu dezenvolve di’ak liután TATOLI iha futuru.
Diretór Komersiál, Dezenvolvimentu Emprezariál no Teknolojia Informasaun ANTARA, Jaka Sugiyanta, konsidera kooperasaun ne’e la’ós de’it ho ajénsia notisioza nasaun rua nian, maibé Reprezenta estadu iha área mídia no informasaun.
“Maibé mós entre Indonézia no Timor-Leste nu’udar estadu iha área jornalizmu nian,” dirijente ANTARA ne’e hateten.
Nia dehan, ANTARA iha papél importante atu fahe informasaun ba públiku hosi parte Indonézia nian no TATOLI mós bele halo ba povu no nasaun Timor-Leste.
Nia fó-sai katak, kooperasaun ne’e relasiona ho dezenvolvimentu rekursu umanu liuhosi formasaun jornalizmu integradu, troka notísia no mós atividade estratéjika sira seluk iha futuru.
Hafoin asina tiha, kontinua kedas formasaun mak hanesan; revolusaun dijitál iha era teknolojia informasaun no komunikasaun, jornalizmu konverjénsia no kódigu étika, mídia mainstream, mídia sosiál no mídia foun (new media), tékniku hasa’e kualidade produsaun, atendimentu informasaun nu’udar ajénsia notisioza iha mundu dijitalizasaun, agenda setting no monitorizasaun mídia iha dezenvolvimentu no publikasaun notísia.
Formasaun hala’o durante semana ida, hahú hosi loron 16 abríl to’o 20 abríl 2024.
Jornalista: Florencio Miranda Ximenes
Editór: Evaristo Soares Martins
