DILI, 18 abríl 2024 (TATOLI)–Komisaun A ne’ebé trata asuntu Justisa no Konstituisonál iha Parlamentu Nasionál (PN), kinta ne’e, simu audiénsia husi Organizasaun Naun Governamentál, Yayasan HAK.
“Ohin, ami halo audiénsia ho Deputadu Komisaun A ho objetivu hato’o serbisu monitorizasaun ne’ebé durante ne’e HAK hala’o ba prizaun tolu hanesan Dili, Gleno no Suai,” Vise-Diretór HAK, Antonino De-Limas, hato’o hafoin ramata audiénsia iha sala Komisaun A, Parlamentu Nasionál.
Durante audiénsia, HAK hato’o deskobrimentu ne’ebé hetan dahuluk mak situasaun iha prizaun tolu liuliu kona-ba infraestrutura, tanba infraestrutura sira ne’e konstrui iha tempu indonéziu to’o mai agora halo de’it manutensaun no loloos presiza harii foun, tanba kondisaun ladún di’ak uma balun komesa a’at, nune’e bele fó tratamentu dignu ba prizoneiru sira.
Aleinde kapasidade iha fatin sela balun, tuir loloos iha kuartu ida akumula ema na’in-rua ka tolu maibé realidade ema na’in-lima uza kuartu ida no laiha ekipamentu hanesan kámera CCTV, inklui rádiu komunikasaun.
Notísia relevante : KM aprova Karreira Espesiál no Estatutu Guarda Prizionál
Nia relata, identifika mós problema menus transporte atu fasilita guarda prizionál no prizoneiru bainhira atu transporta tuir julgamentu iha Tribunál.
“Identifika mós iha mós asisténsia legál durante ne’e, liu-liu servisu defensória públika, rekursu umanu limitadu, nune’e bainhira julgamentu iha Tribunál hetan tiha sentensa asisténsia husi defensória hotu ona, oinsá dadur ne’e nia hetan pena no hela iha prizaun situasaun oinsá ne’e laiha akompañamentu ne’ebé di’ak husi defensór, hanoin loloos ita ko’alia justisa maski sira sai dadur, sira presiza buat ruma atu komunika,’’ nia akresenta.
Reprezentante HAK informa mós situasaun laiha separasaun ba dadur minoridade ho ema adultu, sira hamutuk iha sela kuartu hanesan.
“Hanoin ida-idak ho kazu la hanesan bele influénsia ba malu. Dadur feto iha prizaun Gleno laiha separasaun hamutuk de’it iha bloku, loloos ideal ne’e ketak. Ne’e situasaun ida deteta, hodi hato’o ba komisaun A atu hetan atensaun ne’ebé di’ak ko’alia ba Governu atu hadi’a. Importante mak husi deputadu sira haree bainhira ministériu hato’o planu atu hadi’a kondisaun sira ne’e, husi deputadu sira iha Parlamentu atu haree ba orsamentu sufisiente bele hatán rezolve kondisaun ne’ebé hasoru,’’ nia rekomenda.
Jornalista : Nelson de Sousa
Editora : Julia Chatarina
