DILI, 19 abríl 2024 (TATOLI)–Sekretáriu Estadu Asuntu Toponímia Organizasaun Urbana, Germano Santa Brites Dias, klarifika, durante hala’o atividade iha terrenu organiza sidade Dili, envolve mós FALINTIL-Forsa Defeza Timor-Leste (F-FDTL) hamutuk ho ekipa konjunta hodi asegura situasaun iha terrenu.
“Loos duni, Prezidente Repúblika preokupa ba atividade ne’ebé ami hala’o envolve hotu F-FDTL, ida-ne’e konsidera ditadura, ha’u halo ida-ne’e tanba hetan ameasa barak loos desde la’o hapara bola guling iha sidade laran, entaun Ministériu Administrasaun Estatál (MAE) halo pedidu husu apoiu F-FDTL mai akompaña ami tanba ha’u-nia vida la fa’an iha loja, prezensa seguransa liu-liu F-FDTL mai la’ós atu baku ema maibé apoiu hamriik hodi ami halo ami-nia serbisu,” Sekretáriu Estadu Germano Santa Brites Dias, esplika iha Bidau Senggol, sesta ne’e.
Notísia relevante :PR Horta triste SEATOU halo eviksaun la kria kondisaun
SEATOU lidera serbisu halo eviksaun ba uma no barraka ne’ebé okupa espasu públiku no área protejida hodi hadi’a sidade Dili sai organizadu. Tanba ne’e, kria ekipa konjunta ne’ebé envolve F-FDTL, Polísia Nasionál Timor-Leste (PNTL), Ministériu Obra Públika (MOP), Terra no Propriedade, Jestaun Merkadu Munisípiu Dili no entidade relevante seluk tan.
“Tanba ita envolve F-FDTL ne’e hakarak asegura ekipa bele halo serbisu iha terrenu no la’o tuir nia dalan, tanba durante ekipa konjunta ne’e la’o seidauk estraga ema-nia sasán privadu ka baku ema arbiru iha terrenu, maibé atividade ne’ebé ita halo hasai komunidade okupa rai Estadu no hela iha rai protejida tanba hasai ona notifikasaun desde setembru tinan kotuk to’o mai agora foin hasai,” nia esplika.
Ekipa konjunta halo serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
“Husu ba povu hodi koordena ho Governu, tanba kada Governu mai ho ida-idak ninia progama no planu rasik atu hadi’a sidade Dili. Povu mós tenke hatene katak Governu husik espasu sira ne’e imi uza tinan barak ona, nune’e tempu to’o ona Governu husu fali koopera de’it fó fila la’ós halo reasaun oin-oin hasoru,” nia tenik.
Governante ne’e deklara prontu simu kondisaun ruma husi entidade Estadu no Governu liga ho atividade ne’ebé nia organiza iha terrenu, maski atividade hirak ne’e tama ba programa Governu.
“Ha’u hanesan Sekretáriu Estadu oan ne’e laiha forsa atu hasoru Prizedente Repúblika, ne’ebé desizaun saida de’it mak Primeiru-Ministru fó mai ha’u, ha’u prontu simu, tanba serbisu ne’ebé ha’u halo ne’e ba nasaun nia di’ak, iha ne’ebé de’it dezenvolvimentu atu la’o sempre iha balun la kontente maibé ita tenke halo mudansa,” nia reforsa.
Ekipa konjunta antes ne’e halo ona eviksaun ba uma no barraka komunidade iha Ai-mutin, antigu merkadu Comoro, Bidau Senggol, Aitarak-Laran, no Bidau Santa-Ana, ne’ebé atividade ne’e sei kontinua halo iha fatin ne’ebé hetan ona notifikasaun.
Jornalista : Arminda Fonseca
Editora : Julia Chatarina
