Reprezentante povu husu ME tau atensaun ba infraestrutura eskolár
DILI, 29 abríl 2024 (TATOLI)—Reprezentante povu iha Parlamentu Nasionál (PN) liuhusi Deputadu bankada PD, Manuel Noronha, husu ba ezekutivu liuliu ministériu edukasaun (ME) tau atensaun ba infraestrutura eskolár balun ne’ebé kondisaun ladi’ak hodi bele fasilita prosesu ensinu aprebdizajen ba estudante sira la´o ho di’ak.
Notísia Relevante: ME prioriza konstrui edifísiu eskola foun hamutuk 21 iha 2024
“Komunidade kestiona kona-ba kondisaun eskola iha suku Daisua, aldeia Reatu, bairru Mauren ne’e konstrui iha tinan 2009 liuhusi projetu pakote referendu, até agora eskola ne’e iha kondisaun ne’ebé grave tebes no fó ameasa ba estudante sira-ne’ebé halo aprendizajen iha fatin refere. Hato’o mós eskola ne’ebé konstrusaun husi pakote referendun kuaze implementa iha territóriu laran parese kondisaun grave hanesan eskola refere, ho nune’e husu Vise Ministru ba asuntu Parlamentár atu enkamina ba ministériu relevante atu identifika eskola sira-ne’e hodi tau prioridade hodi halo konstrusaun, nune’e bele fasilita ita-nia oan sira ba futuru,” nia levanta liuhusi reuniaun plenária, Parlamentu Nasionál, segunda ne’e.
Iha parte seluk, Deputada FRETILIN, Marquita Soares, hateten eskola CAFE iha munisípiu Baucau ne’ebé mak konstrui iha tinan 2012 ne’ebé uza osan boot maibé ikus mai estragu no abandona até iha ninia kakuluk anin sobu, nune’e konstrusaun abandona to’o agora.
Aleinde ne’e, eskola CAFE munisípiu Viqueque to’o agora seidauk iha kondisaun ne’ebé mak di’ak ba ensinu aprendizajen.
Iha eskola CAFE Ermera mós manorin timoroan lamenta tebes, kondisaun hela fatin nune’e mós saláriu ne’ebé mak simu la sufisiente ba sira atu kobre kost ka hela fatin ne’ebé atu hanorin alunu sira.
“Aleinde ne’e, profesór ida hanorin dalen inglés ne’ebé mak kualidade di’ak, tanba ho saláriu ne’ebé mak kiik, nia deside rezigna aan hodi fila-fali ba nia munisípiu ne’ebé nia horik ba. Se ita la tau atensaun ba profesór sira-ne’e sei sai no sei buka fatin seluk no sei menus profesór iha eskola sira iha fatin-fatin, nune’e husu Ministériu Edukasaun atu tau atensaun,” nia dehan.
Vise Ministru ba asuntu Parlamentár, Adérito Hugo da Costa, rejista preokupasaun husi Deputadu sira-nian hodi haruka ba ministériu tutela atu fó atensaun.
Jornalista : Nelson de Sousa
Editór : Cancio Ximenes
