DILI, 02 maiu 2024 (TATOLI)– Sekretáriu Ezekutivu Konsellu Nasionál Desportu (KND), Cesarino da Silva, informa atleta prestadu sira ne’ebé iha tinan kotuk hatudu rezultadu di’ak durante jogu internasionál simu ona subsidiu husi Governu.
“Atleta sira ne’ebé tinan kotuk kompete iha jogu Asian Games, SEA Games no jogu Paralimpíku internasionál ita atribui hotu ona subsidiu ba sira tuir kategoria ne’ebé mak defini ona,” Cesarino hatete ba Agência TATOLI iha edifisiu Ministeriu Juventude Desportu Arte no Kultura (MJDAK) Lecidere, kinta ne’e.
Kona-bá fó bolsa estudu, nia dehan Governu só fó de’it ba atleta na’in-ida husi modalidade Boxe mak Delio Mouzinho no iha tinan ne’e konsege aprova ona $1,000 ba nia hodi selu eskola.
“Bolsa estudu só ida de’it mak Delio, kada tinan nia halo proposta mai mak foin deside atu fó osan ba nia, nune’e bele selu nia eskola,” nia katak.
Rekorda fali katak, iha loron 30 fulan-outubru 2023, KND realiza reuniaun hodi deside atribui subsidiu ba atleta prestadu sira ne’ebé hatudu ona rezultadu iha jogu internasionál sira.
Desizaun ne’ebé KND foti bazeia ba diploma ministeriál númeru 7/SEDPAC/III/2018 iha loron 21 Marsu ne’ebé fó dalan ba atleta prestasaun ne’ebé konsege lori ona medalla iha jogu internasionál sira merese hetan rekoñesimentu husi Governu.
Nune’e, Governu rejista iha tinan 2023 atleta hamutuk 24 mak hatudu prestasaun di’ak iha jogu internasionál sira.
Atleta Boxe
Governu fó ona subsídiu no bolsa estudu ba boxista Delio Mouzinho joga iha SEA Games Kamboja iha kilograma 71 konsege lori medalla osan metan hetan osan hamutuk $1.500. Edegar da Silva iha SEA Games Kamboja joga iha kilograma 54 lori medalla osan metan ida simu osan hamutuk $1.500.
Karate-do
Deonisio Fernandes Pereira iha SEA Games Kamboja joga iha menus kilograma 67 hetan medalla osan metan ida no simu osan hamutuk $1,500. Quefi Jacob Manuel iha SEA Games Kamboja joga iha menus kilograma 75 lori medalla osan metan ida no simu osan hamutuk $1,500.
Taekwondo
Mousaco Galucho iha SEA Games Kamboja joga iha mais kilograma 87 hetan medalla osan metan ida no simu osan hamutuk $1,500. Cerilio do Rego Cruz Lein iha SEA Games Kamboja joga iha menus kilograma 58 hetan medalla osan metan ida no simu osan hamutuk $1.500. Imbrolia Amorin iha SEA Games Kamboja joga iha menus 62 hetan medalla osan metan ida no simu osan hamutuk $1,500. Ana da Costa Belo iha SEA Games Kamboja joga iha menus 46 hetan medalla osan metan ida no simu osan $1.500.
Atleta sira husi Paralimpiku ne’ebé ba joga iha ASEAN Paralimpiku iha Indonézia.
Atletizmu
Teofilo Freitas kompete iha metru 800 konsege hetan medalla osan mean no iha metru 1500 nafatin hetan medalla osan mean no simu osan hamutk $7,000. Abel de Jesus Martins kompete iha metru 1500 konsege hetan medalla osan metan ida no simu osan $1,500.
Halterofelizmu
Silveiro Martins Soares kompete iha mais kilograma 65 konsege hetan medalla osan metan ida no simu osan hamutuk $1,500.
Ténis Meza
Pascoela dos Santos iha kompetisaun konsege hetan medalla osan mutin ida no hetan osan $2,500. Paulo da Silva Neves iha kompetisaun konsege hetan medalla osan metan ida no simu osan hamutk $1,500. Liliana da Costa iha kompetisaun konsege manán medalla osan metan ida no simu osan hamutuk $1,500.
Atleta sira ne’ebé kompete iha jogu Espesiál Olimpiku iha Fransa
Norberta da Cruz iha kompetisaun konsege manán medalla osan mutin ida no mean ida no simu osan hamutuk $2,500. Óscar Alexandrino dos Santos iha kompetisaun konsege manán medalla osan metan ida no simu osan hamutuk $750. Felizarda Marçal da Costa iha kompetisaun konsege manán medalla osan mean ida metan ida no simu osan hamutuk $2,250.
Nune’e osan ne’ebé atribui ba atleta sira hamutuk $42.000 inklui mós treinadór sira ne’ebé akompaña atleta sira mós simu hotu osan husi montante ne’e.
Medalla ne’ebé atleta sira rekolla husi 2001-2022
Hahú iha tinan 2001 Arafura Games iha Australia atleta hamutuk na’in-tolu hanesan, Calsito da Costa hetan primeiru lugar iha kurida metro 10.000 konsege hetan medalla osan mean rua, Maria Dias Ximenes primeiru lugar iha metro 5000 no 10.000 konsege rekolla medalla osan mean tolu no Domingas Monteiro compete iha metru 3000-5000 konsege hetan terseiru lugar rekolla medalla osan metan tolu.
Iha tinan 2005 iha jogu da Lusufonia ne’ebé partisipa hosi nasaun hotu iha mundu inklu nasaun sira iha Koalia lian Portugés (CPLP-sigla Portugés) Timor – Leste iha modalidade atletizmu reprezenta hosi atleta na’in rua Elias de Deus no Calisto da Costa, iha jogu ne’e Elias compete iha metru 3000 konsege sai primeiru lugar hetan medalla osan mean ida, nune’e Calisto da Costa compete iha metru 5000 konsege hetan primeiru lugar no medalla osan mean ida.
Kontinua iha tinan 2009 Timor – Leste nafatin hetan konvite hosi Australia hodi partisipa iha jogu Arafura Games partisipa hosi atleta Augosto Ramos Soares kompete iha metro 10.000 konsege okupa terseiru lugar no hetan medalla osan metan ida.
Nune’e iha tinan 2010-2011 Dili Internasionál Maratona halao iha Dili no nasaun barak iha mundu mak mai Kompete Timor – Leste reprezenta hosi Augosto Ramos Soares halai iha full Marathon okupa iha terseiru lugar hodi rekolla medalla osan metan tolu iha kategoria nasionál.
Hakur ba tinan 2014 Timor – Leste liu hosi atletizmu kontinua partisiapa iha jogu Asian Junior Championship ne’ebé halao iha Xina partisipa hosi atleta Domingos Xavio halai iha metru 400 konsege sai terseiru lugar ofrese kedan medalla osan metan ida mai Timor – Leste.
Nafatin iha tinan 2014 Timor – Leste mantein iha pozisaun hosi modalidade atletizmu partisipa iha eventu Jogo da Lusufonia iha India marka prezensa hosi atleta Samuel dos Santos Marchal konsege okupa iha terseiru lugar hodi rekolla medalla osan metan ida.
Dolar ba tinan 2016 jogu ASEAN University Games iha Singapura atletizmu reprezenta na’in rua feto Marquita dos Santos no Joventina Napoleão, iha ne’ebé Marquita okupa iha terseiru lugar kurida iha metru 800 hetan medalla osan metan ida no Joventina okupa segundu lugar iha metro 10.000 hetan medalla osan mutin ida.
Nafatin iha tinan 2016 Joventina nafatin hetan fiar hosi FATL ba partisipa iha eventu internasionál Toraja Marathon iha Indonezia no atleta ne’e compete iha metru 10.000 konsege okupa iha segundu lugar hetan medalla osan mutin ida.
Eventu internasionál nafatin monu iha tinan 2016 nia laran fó nafatin oportunidade ba atleta atletizmu ran Timor sir aba compete nune’e iha eventu Galaxy Marathon ne’ebé realiza iha Timor – Leste reprezenta atleta Nelia Martins konsege prodúz medalla rua osan mutin ida no metan ida tanba aokupa iha segundu lugar no terseiru lugar.
Nune’e liu de’it fulan ida eventu Sea Yuoth iha Thailandia Timor –Leste reprezenta atleta Rubia Martins mak ba kompete iha metru 3000 atleta ne’e konsege hetan terseiru lugar rekolla kedan medalla osan metan ida, ho nune’e atleta ne’e hakur kedan ba eventu internasionál Toraja Marathona iha Indonezia, iha eventu ne’e la lakon le’t de’it tanba atleta feto ne’e nafatin hatudu prestasaun di’ak hodi mantein nia pozisaun sai hanesan terseiru lugar ofrese medalla osan metan ida no fila mai Timor – Leste ho medalla rua.
Iha 2017 hanesan tinan sorte ba modalidade Atletizmu iha eventu Sea Youth Games iha Filipina atleta na’in tolu mak reprezenta konsege lori medalla hamutuk ualau mak mai Timor – Leste, atleta hirak ne’e mak hanesan Felisberto de Deus kompete iha metru 3000 hetan primeiru lugar rekolla medalla osan mean ida tuir fali iha metru 5000 nia konsege okupa segundu lugar hetan medalla osan mutin ida, tuir fali atleta Rubia Martins compete iha metru 3000 hetan segundu lugar medalla osan mutin ida, metru 2000 nia okupa terseiru lugar medalla osan metan ida, iha metru 5000 nia hetan primeru lugar medalla osan mean ida, iha metru 3000 nia nafatin okupa primeiru lugar medalla osan mean ida tan no atleta Ermelinda Ornai kompete iha metru 5000 okupa segundu lugar konsege hetan medalla osan mutin ida, iha metro 3000 nafatin segundu lugar medalla osan mutin ida.
Iha 2017 nia laran nafatin atleta Nelia Martins partisipa iha eventu Galaxya Marathon nia konsege rekolla medalla osan metan ida tanba okupa terseiru lugar, nafatin iha 2017 Dili Marathon atleta Romenio de Deus Maia kompete ho atleta hotu mai hosi mundu tomak maibé iha kategoria nasionál nia konsege hetan primeiru lugar rekolla medalla osan mean ida.
Semo ba tinan 2018 Sea Youth Games halao iha Thailandia Timor – Leste liu hosi modalidade atletizmu raut tan medalla osan mutin no metan iha eventu ne’e.
Iha eventu ne’e partisipa atleta Timoroan hamutuk na’in tolu hanesan Manuel Belo kompete iha metru 800 hetan terseiru lugar medalla osan metan, iha metru 1500 okupa iha terseiru lugar medalla osan metan, atleta Roberto Amaral kompete iha metru 2000 hetan terseiru lugar medalla osan metan ida, iha metru 3000 konsege okupa segundu lugar hetan medalla osan mutin ida no atleta Angela Freitas Araujo halai iha metru 800 segundu lugar medalla osan mutin ida, iha metru 1500-3000 hetan segundu lugar medalla osan mutin rua no atleta Octaviana Soares halai iha metru 3000 konsege sei terseiru lugar hetan medalla ona metan ida.
Iha tinan ikus 2018 atleta Manuel Belo hetan konfiansa hosi federasaun ba partisipa iha eventu internasionál Sea Youth Olympic iha Thailadia halai iha metru 1500 konsege hetan terseiru lugar medalla ona metan ida.
Iha tinan 2019 atleta atletizmu nafatin partisipa iha eventu Sea Youth iha Filipina konsege hatudu rezultadu nafatin tanba ofrese nafatin medalla osan mean metan no mutin, atleta Natilva Marçal Trindade halai iha metru 1500 konsege hetan segundu lugar medalla osan mutin ida, iha metro 2000 primeiru lugar medalla osan mean ida, atleta Roberto Soares kompete iha metro 800 segundu lugar medalla osan mutin ida, iha metru 1500 okupa terseiru lugar hetan medalla osan metan ida no iha metru 2000 okupa iha segundu lugar medalla osan mutin ida.
Ikus liu iha tinan 2022 atletizmu nafatin partisipa iha SEA Games Vietname compete iha metru 10.000 segundu lugar medalla osan mutin ida, iha metru 5000 nafatin segundu lugar medalla osan mutin ida.
Jornalista : Hortencio Sanchez
Editór : Florencio Miranda Ximenes
