PR Horta: Jornalista iha papél importante atu salva planeta husi mudansa klimátika
DILI, 02 maiu 2024 (TATOLI) – Loron 03 fulan-maiu hanesan loron mundiál ba liberade imprensa iha Mundu inklui Timor-Leste. Nune’e Prezidente Repúblika husu ba jornalista atu serbisu ho responsabilidade hosi salva planeta husi mudansa klimátika.
“Iha Loron Mundiál Liberdade Imprensa nian ida-ne’e, mai ita renova ita-nia kompromisu ba Imprensa ba Planeta ne’ebé fó sai lia-loos ambientál sira, fó inspirasaun ba mudansa sira, no proteje natureza iha mundu ba jerasaun sira tuir mai,” Xefe Estadu hato’o nia mensajen liuhusi nota ne’ebé Agência TATOLI asesu husi mídia Palásiu Prezidensiál Dili, ohin.
Aproveita loron Mundiál Liberdade Imprensa nian ida ne’e, Xefe Estadu hato’o parabéns ba jornalista sira ne’ebé fó naroman ba ameasa urjente ida-ne’ebé hasoru umanidade no krize ambientál.
Imprensa ida-ne’ebé livre no independente ne’e esensiál tebes atu hasa’e konsiénsia, dirije asaun, no ka’er metin lider sira no instituisaun sira ne’ebé responsavél ba asuntu ambientál sira.
Tema iha 2024 “Imprensa ba Planeta ” ne’e hanesan apelu importante ida ba jornalizmu atu foka nia lensa ba degradasaun husi natureza mundu nian. Husi mudansa klimátika to’o lakon biodiversidade, poluisaun to’o desflorestasaun, emerjénsia ambientál fó impaktu ba kada nasaun, komunidade, no ema iha planeta ida ne’e.
“Iha Timor-Leste, ita-nia nasaun foin-sa’e ida ne’e hetan ona efeitu ne’ebé aat tebes husi mudansa klimátika inklui produsaun agríkola ne’ebé menus, inseguransa ai-han, falta bee, destruisaun infraestrutura, lakon vida no deslokasaun umanu. Ita-nia futuru no sorte sira liga ho ita-nia kualidade anin, rai no tasi. Ita tenke proteje ita-nia ambiente ne’ebé importante tebes atu sustenta ita,” nia tenik.
Ho nune’e, Xefe Estadu ejize ba jornalista hotu iha Timor-Leste no iha nivél globál atu halo responsabilidade importante hanesan guarda ba ambientál sira.
“Jornalista sira iha papél importante atu hala’o kobertura ba krize ida-ne’e ho forma objetiva, kontinuidade, no komprensivu. Tau ó-nia lapijera no kamera nu’udar instrumentu atu defende planeta ne’e. Liuhusi hasa’e konsiénsia husi imprensa ne’ebé la-hetan presaun, ita bele harii vontade públiku no polítika atu halo asaun ho aten-barani,” nia katak.
Tuir nia, Ambiente laiha lian rasik – presiza lian imprensa livre atu sai nia advogadu ba prezervasaun no restaurasaun.
“Obrigadu, no ha’u-nia votus kmanek ba jornalista sira hotu ne’ebé ho aten-barani hala’o servisu importante ida-ne’e,” konklui.
Jornalista: Hortencio Sanchez
Editór: Florencio Miranda Ximenes
