DILI, 10 maiu 2024 (TATOLI)—Inspetór Eskolár iha munisípiu Manatuto daudaun ne’e hasoru difikuldade transportr ne’ebé atu uza halo monitorizasaun iha eskola sira.
“Daudaun ne’e inspetór eskolár iha munisípiu Manatuto hamutuk na’in-ualu, ne’e maka ensinu báziku na’in-neen no pre-eskolár iha na’in-rua. Tuir informasaun ne’ebé ami iha katak sei aumenta tan na’in-ida ba ensinu sekundáriu jerál no tékniku vokasionál, maibé inspetór sira ne’e laiha transporte tanba daudaun transporte tuan sira-ne’e balun a’at hotu ona, agora ida iha Laleia ne’e maka transporte laiha,” Direitór Servisu Edukasaun Munisípiu Manatuto, Patrício da Cruz Quintão, informa, iha ninia knaar fatin, sesta ne’e.
Notísia relevante : Inspetór eskolár iha territóriu sei hetan motorizada hodi tulun sira halo serbisu
Nia dehan, bainhira laiha transporte, sei difikulta inspetór eskolár sira-nia atividade regulár sira.
Nune’e mós, Direitór Edukasaun munisípiu Ainaro, Patrício da Costa Magno, informa, inspetór eskolár sira iha Ainaro presiza motorizada foun tanba ida tuan ne’e tama ona ba prosesu leilaun.
“Kona-ba fasilidade ba ita-nian inspetór eskolar sira-ne’e,motorizada mak tuan ona, ne’e leilaun hotu ona, ita espera katak Ministériu Edukasaun bele haree motorizada foun ne’ebé bele fó ba inspetór sira iha munisípiu, nune’e bele fasilita ita-nia inspetór sira-nia serbisu, liu-liu halo kontrolu ba atividade ne’ebé la’o iha ita-nia eskola iha área remota,” nia tenik.
Jornalista : Osória Marques
Editora : Julia Chatarina
