iklan

EKONOMIA, INTERNASIONÁL, DILI, HEADLINE

Governu aprova donativu rihun $61 ba Nunsiatura Apostólika iha Timor-Leste

Governu aprova donativu rihun $61 ba Nunsiatura Apostólika iha Timor-Leste

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (15/05). Imajen Tatoli/Francisco Sony

DILI, 14 maiu 2024 (TATOLI) – Governu liuhusi reuniaun ordinária Konsellu Ministru (KM), kuarta ne’e, aprova projetu rezolusaun Governu hodi atribui donativu ida ho valór $61.500 ba Nunsiatura Apostólika iha Timor-Leste.

“Osan ne’e hodi halo instalasaun ba elevadór ida iha edifísiu Nunsiatura nian, nune’e hodi garante kondisaun adekuada kona-ba alojamentu no mobilidade ba Sua Santidade Papa Francisco durante ninia vizita mai Timor-Leste iha fulan-setembru,” tenik iha nota ne’ebé Agência TATOLI asesu husi media Gabinete Primeiru-Ministru.

Rekorda fali katak, vizita Sua Santidade Papa Fransisco mai Timor-leste, Governu liu-husi reuniaun estraordinariu konsellu Ministru delibera ona atu autoriza despeza to’o montante millaun $12 husi fundu kontijensia ba Komisaun altu nível institusionál, hodi organiza atividade Preparasaun ba vizita Papa Francisco nian.

Durante vizita, eventu lubuk ne’ebé sei akontese no antes ne’e Reprejentante Santasé husi Roma halo ona reuniaun barak ho ekipa Governu nian, ho Ministériu oin-oin ne’ebé lideradu husi Primeiru Ministru.

Tuir orariu, Papa Francisco sei vizita Timor-Leste hahú loron 11-13 setembru tinan ne’e. Antes mai Timor-Leste Papa Francisco sei mai uluk Indonézia, liuba Papua Nova Guine, mai Timor-Leste no liu ba Singapura hafoin fila hikas ba Vatikanu.

Notisia relevante:Santa Sé anunsia logótipu no lema ofisiál vizita Papa Francisco mai Timor-Leste

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!