iklan

EKONOMIA, HEADLINE, MUNISÍPIU, OÉ-CUSSE (RAEOA)

Governu distribui foos tonelada 50 ba Oé-Cusse ho folin baratu

Governu distribui foos tonelada 50 ba Oé-Cusse ho folin baratu

Governu apoia foos tonelada 50 iha Oé-Cusse fa'an ho folin baratu. Imajen Tatoli/Abílio Elo Nini.

OÉ-CUSSE, 16 maiu 2024 (TATOLI) – Governu liuhusi Ministériu Turizmu, Komérsiu no Indústria (MTKC, sigla portugés) hamutuk ho Minsitériu Koordenadór Asuntu Ekonomia (MCAE), liuhusi Sentru Lojístika Nasionál (CLN), kinta ne’e distribui foos tonelada 50 iha Rejiaun Administrativa Espesiál Oé-Cusse Ambeno (RAEOA) atu fa’an ba komunidade sira ho folin baratu.

“Ohin ami mai koordena ho parte Autoridade RAEOA, hodi realiza bazár baratu ba produtu foos ho marka MCAE, kilograma 25 ho folin $12,50,” Diretora Nasionál Regulasaun Komérsiál no Protesaun Konsumidor husi MCAE, Manuela da Silva Tilman, ko’alia iha Gabinete Autoridade RAEOA.

Nia informa, foos sira-ne’e la’ós de’it atu halo distribuisaun iha postu administrativu maibé asesu to’o iha suku no aldeia sira, nune’e komunidade sira-ne’ebé kbiit la to’o bele senti katak, Governu halo netik buat ruma ba sira no bele asesu ba foos ho folin barratu.

“Foos mai Oé-Cusse tonelada 50 ba saka 2000, mak atu distribui direitamente ba komunidade no akompaña husi ekipa RAEOA atu to’o iha fatin distribuisaun mak, iha sub-rejiaun Oésilo iha suku Bobometo, sub-rejiaun Pássabe iha suku Abani no sub-rejiaun pante Makasar iha suku Taiboko no mós suku sira seluk tán,” nia katak.

Tanba ne’e, atu labele hamosu espekulasaun, maka parte tékniku akompaña direitamente to’o kedas iha fatin distribuisaun atu nune’e família ida iha direitu hetan saka ida, nune’e iha balansu ba ema hotu.

Iha biban ne’e, Prezidente Autoridade RAEOA, Rogério Tiago Lobato, agradese ba Governu Sentrál tanba bele evita espekulasaun folin foos iha merkadu.

“Foos ne’e importante ba ita hotu, maibé atu evita espekulasaun presu iha merkadu, ne’e hanesan kontribuisaun boot husi Governu Sentrál mai iha RAEOA, ne’ebé ha’u agradese ba jestu solidariedade ida-ne’e mai povu Oé-Cusse,” nia konklui.

Notísia relevante: Governu presiza intervein folin foos iha Oé-Cusse, saka ida $20

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!