TLDPM: Governu ho Parseiru hakarak konsentra ba dezenvolvimentu tuir PEDN
DILI, 17 maiu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, relata, durante loron tolu hahú 15 to’o 19, Governu liuhusi Ministériu Finansa, realiza Timor-Leste Development Partnert Meeting hodi haree ba dezenvolvimentu durante tinan lima tuir Planu Estratéjiku Dezenvolvimentu Nasionál (PEDN).
“Ida-ne’e atu ko’alia ho ita nia parseiru dezenvolvimentu sira atu haree ba dezenvolvimentu Timor-Leste nian ba tinan lima ho baze ba ita nia Planu Estratéjiku Dezenvolvimentu Nasionál, ne’ebé ita nia doadór lubuk ida mak partisipa iha reuniaun ne’e hanesan Uniaun Europeia (UE), husi ASEAN nian, Oseania, Estadu Unidu Amérika (EUA), Japaun, Korea Súl, Xina no seluk tan, sira hotu prontu atu apoiu ita nia dezenvolvimentu,” Ministru Bendito katak ba jornalista sira iha edifisiu Ministériu Finansa, Aitarak-Laran-Dili, sesta ne’e.
Timor-Leste’s Partnerships Development Meeting (TLPDM-Sigla Inglés) ne’ebé prezide hosi Primeiru Ministru (PM) RDTL Kay Rala Xanana Gusmão ho ho tema ” “Timor Asaun Planu tinan lima Governu Konstitusionál da-9 nian”
sai hanesan plataforma ida hodi hatudu no diskute vizaun no prioridade estratéjiku Governu nian ba tinan lima oin.
Parseiru sira hanesan Asian Development Bank (ADB), International Finance Cooperation (IFC) no Banku Mundiál prontu nafatin atu tulun Timor-Leste hodi fó kontinuidade ba prosesu dezenvolvimentu nasionál.
“Enkontru ne’e hanesan mós instrumentu ida atubele halo avaliasaun, analiza kada tinan, atu nune’e Governu bele propoin planu asaun tuir mandatu liuliu iha Governu ida-ne’e nian atu ezekuta oinsa. Entaun parseiru dezenvolvimentu espresa sira nia vontade di’ak atu apoiu nafatin ita,” nia afirma.
Parseiru dezenvolvimentu hotu iha Timor-Leste kontente ho planu ne’ebé Governu iha liuliu hato’o husi Primeiru-Ministru, Kay Rala Xanana Gusmão, Vise Primeiru Ministru na’in-rua Asuntu Ekonómika no Asuntu Dezenvolvimentu Rurál. Asuntu infrastrutura aprezenta husi Ministru Planeamentu Investimentu Estratéjiku (MPIE).
“Iha ita nia aprezentasaun durante enkontru TDPM ne’e ita nia parseiru sira enfaze ba prosesu kooperasaun liuliu mekanizmu koordenasaun, nune’e aspeitu setorál bele la’o. Entaun ami hanesan Ministériu Finansa ho MNEK servisu hamutuk atu halo ajenda ka orariu. Nune’e bele iha diskusaun tematika hodi bele promove dezenvolvimentu ita nian iha Governu ida ne’e ba tinan lima mai,” nia esplika.
Servisu hotu ne’ebé Governu halo hodi responde fazeadamente ho sistematika kona-ba nesesidade ba infrastrutura, kapasitasaun rekursu umanu, ekonomia, agrikultura, programa nutrisaun, edukasaun saúde no seluk tan.
Notisia relevante:PR Horta sei sai ordadór prinsipál iha reuniaun anuál TLDPM
Jornalista: Hortencio Sanchez
Editór : Florencio Miranda Ximenes
