DILI, 22 Maiu 2024 (TATOLI)–Diretór Servisu Apoiu Diagnostíka no Terapeutíka, Ospitál Nasionál Guido Valadares (HNGV-sigla portugués), Vidal de Jesus Lopes, klarifika katak problema eletrisidade ne’ebé mate iha ospitál nasionál la fó impaktu boot ba pasiente sira ne’ebé oras ne’e hala’o hela tratamentu saúde.
Nia hato’o asuntu ne’e hodi responde ba kritíka no lamentasaun barak hosi públiku ne’ebé maka públika iha média sosiál facebook, relasiona ho akontesimentu eletrisidade mate iha HNGV iha tersa kalan ne’e.
Notísia Relevante :HNGV falta stock ai-moruk 20%
“Atendimentu ba iha HNGV la’o normal maske ahi mate sein vezes ona. Horikalan ahi mate 15 minutu, maibé ami hetan xamada no kritíka barak, hanesan jestór, ami mós foti alternativa ida, ami mós iha jeradór ho kapasidade ne’ebé labele kobre HNGV tomak,” nia esplika iha konferénsia imprensa ne’ebé hala’o iha Kampu Alor Dili, kuarta ne’e.
Portavóz Ekipa Integradu Saúde iha Ministériu Saúde ne’e hateten, bainhira eletrisidade mate, HNGV iha jeradór ho kapasidade naton atu koresponde ba Unidade Sirúrjia, Unidade Hemodialisa ka fase ran no Unidade Kuidadu Intensivu (ICU) tanba unidade tolu ne’e maka dependensia maka’as ba enerjia eletrisidade bainhira halo tratamentu saúde.
“Pasiente sira iha ne’ebá ne’e sira-nia vida depende de’it ba mákina, se ahi laiha sira-nia vida ameasadu, tanba ne’e mak back up jeradór ne’e fatin tolu. Horikalan durasaun minutu 15 mak ahi mate,” nia reforsa.
Nia husu ba públiku atu labele politija situasaun ne’e ba interese privadu. “Ami rekoiñese ida ne’e duni iha bu’at barak ami tenke hadi’a, maibé ema nia vida ne’e, ita hotu-hotu ita-nia uma bo’ot mak HNGV kualker momentu ita-nia fatin ikus mak ne’ebá, ne’e duni ita tenke informa loloos,” nia hateten.
Durante ne’e, nia dehan problema eletrisidade mate beibeik, maibé prosesu atendimentu ba pasiente sira la’o hanesan baibain.
Notísia Relevante :Komisaun F rekomenda pontu neen ba HNGV
Jornalista: Jesuína Xavier
Editor: Agapito dos Santos
