OÉ-CUSSE, 27 maiu 2024 (TATOLI) – Autoridade Rejiaun Administrativa Espsiál Oé-Cusse Ambeno (RAEOA), konvida Ministériu Justisa liuhusi Vise-Ministru Fortalesimentu Institusionál, Paulo Manuel Remédios, atu haforsa programa boa governasaun no transparánsia ba instituisaun Estadu sira iha Oé-Cusse.
“Agradese tanba konvite ne’ebé ami fó hodi husu mai iha Oé-Cusse, bele responde, no ohin mai to’o Oé-Cusse,” Prezidente Autoridade RAEOA, Rogério Tiago Lobato, ko’alia iha enkontru kortezia ho Vise-Ministru Fortalesimentu Institusionál, Paulo Manuel Remédios, iha salaun Autoridade Oé-Cusse, segunda ohin.
Notísia relevante: Alkatiri keixa: Prezidente Autoridade RAEOA Rogeiro Lobato hatán
Vise-Ministru Fortalesimentu Institusionál, Paulo Manuel Remédios, informa, polítika boa-governasaun no transparánsia nu’udar mós programa IX Governu nian, nune’e presiza tau matan ba instituisaun Estadu sira liu-liu iha Oé-Cusse.
“Objetivu ami mai ne’e atu responde ba konvite husi Prezidente Autoridade RAEOA fó, atu mai vizita atu haree instituisaun Governu nian, atu reforsa instituisaun ba programa boa governasaun no mós programa transparánsia bazea programa IX Governu nian, ha’u agradese ba konvite husi Autoridade RAEOA, aproveita tan atu fó ha’u-nia opiniaun kona-bá kestaun asuntu rua importante, boa governasaun no transparánsia iha Governu nian,” nia orgullu.
Tuir nia, kona-bá kestaun problema iha rezidénsia Fulolo, nia parte seidauk iha informasaun kompletu, maibé nia promete sei halo mós levantamentu kona-bá polémika rezidénsia Fulolo.
“Ha’u sei kontinua ha’u-nia vizita, aban ba instituisaun tutela ba Governu Sentrál iha RAEOA, atu halo levantamentu dadus informasaun depois, karik iha informasaun levante, ha’u prepara relatóriu ba Primeiru Ministru atu informa situasaun kazu ida-ne’e, ha’u seidauk iha informasaun kompletu,” nia dehan.
Notísia relevante: Lúcia Lobato rekolla preokupasaun Autoridade Judisiáriu Oé-Cusse hodi aprezenta bá Primeiru Ministru
Jornalista: Abílio Elo Nini
Editór: Evaristo Soares Martins
