MF fasilita formasaun jestaun finanseira ba funsionáriu finansa Oé-Cusse
OÉ-CUSSE, 27 maiu 2024 (TATOLI) – Ministériu Finansa (MF), fasilita formasaun kona-bá jestaun finanseiru atu hasa’e koñesimentu ba funsionáriu na’in-28 iha Sekretaria Rejionál ba Asuntu Finansa Rejiaun Administrativa Espesiál Oé-Cusse Ambeno (RAEOA).
“Ami mai atu fó formasaun ba iha área tolu fokuliu ba planeiamentu, aprovizionamentu no jestaun finansa públika,” Diretór Jerál Sentru Kapasitasaun Jestaun Finansa Públika hosi Ministériu Finánsa, Martinho Lopes, ba jornalista sira iha Oé-Cusse, segunda ne’e.
Notísia relevante: Autoridade sei rekruta funsionáriu 44 hodi haforsa servisu finansa Oé-Cusse
Diretór Jerál ne’e, informa, formasaun ne’e importante ba RAEOA, tanba funsionáriu balu foun, presiza iha koñesimentu ba sistema finansa nian.
“Tuir informasaun ne’ebé ami simu tanba ekipa iha parte finansa nian balu foun, entaun presiza mós hasa’e koñesimentu ba sira oinsá uza sistema kona-bá prosedimentu ba pagamentu sira-ne’e, bele la’o tuir regra no prosedimentu ne’ebé iha,” nia informa.
Sekretária Rejionál ba Asuntu Finansa, Elvira de Carvallu Manat, agradese tanba formasaun durante loron neen, fasilita husi Ministériu Finansa no Department of Foreigh Affairs and Trade (DFAT) Pathnership For Human Development (PHD).
“Ita agradese tanba formasaun ida-ne’e hetan mós apoia DFAT PHD, liuliu kona-bá sistema finansa nian, kapasita ba funsionáriu na’in-28 mak sei partisipa iha formasaun ne’e durante loron neen,” nia konklui.
Notísia relevante: OJE 2024, RAEOA seidauk ezekuta kapitál menór no kapitál dezenvolvimentu
Entretantu, formasaun ne’e realiza durante loron neen, hahú iha segunda ohin, 27 maiu sei termina iha sábadu 01 juñu 2024 ne’e.
Jornalista: Abílio Elo Nini
Editór: Evaristo Soares Martins
