HEADLINE, KAPITÁL

SEATOU husu komunidade okupa resintu eskola iha kapitál Dili hodi hamamuk fatin

SEATOU husu komunidade okupa resintu eskola iha kapitál Dili hodi hamamuk fatin

Sekretáriu Estadu Asuntu Toponímia no Organizasaun Urbana, Germano Santa Brites Dias. Imajen Tatoli/Francisco Sony

DILI, 28 maiu 2024 (TATOLI)—Ekipa konjuta ne’ebé lidera husi Sekretaria Estadu Asuntu Toponímia no Organizasaun Urbana (SEATOU) husu komunidade ne’ebé okupa resintu eskola sira iha kapitál Dili hamamuk fatin molok ekipa tun sobu.

“Ministériu Edukasaun (ME) husu Ministériu Administrasaun Estatál (MAE) atu ekipa SEATOU haree komunidade ne’ebé okupa resintu eskola sira iha kapitál Dili, ita husu komunidade koopera hamamuk fatin,” Sekretáriu Estadu Asuntu Toponímia no Organizasaun Urbana, Germano Santa Brites Dias, informa hafoin halo operasaun ba animál fahi iha Universidade da Paz nia kotuk, tersa ne’e.

Notisia relevante : ME husu komunidade okupa arredór eskola prepara-aan hamamuk fatin

Ekipa SEATOU sei haree komunidade ne’ebé okupa resintu eskola sira iha kapitál Dili, nune’e define ema ne’ebé hela iha resintu eskola tenke hanesan manorin, se la’ós manorin tenke sai nune’e bele reabilita eskola ka planu seluk ruma eskola nian.

“Ita la’ós manorin-na’in mak ba okupa fali resintu eskola nian, hanoin ladi’ak tanba eskola sira iha planu atu halo reabilitasaun ka harii eskola tenke pendente tanba de’it ita ba okupa,” nia akresenta.

Antes ne’e, Ministra Edukasaun, Dulce Maria de Jesus, husu komunidade ne’ebé okupa resintu eskola iha kapitál Dili tenke prepara-an hamamuk fatin tanba ministériu sei haruka karta sirkulár ida.

Resintu eskola sira iha kapitál Dili ne’ebé komunidade okupa mak Eskola Ensinu Sekundáriu Jerál (ESJ) 10 Dezembru Comoro, Eskola ESJ 4 de Setembru UNAMET Balide, Eskola Ensinu Báziku Sentrál Bidau Akadiru-hun, no Eskola Sekundária Tékniku Vokasionál Indústria no Teknolójia (ESTVIT) Becora.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!