INFORDEPE fasilita formasaun edukasaun inkluziva no literasia ba profesór 35 iha Oé-Cusse

OÉ-CUSSE, 29 maiu 2024 (TATOLI) – Profesór husi Ensinu Pré-Eskolár (EPE) na’in-35 iha Rejiaun Administrativa Espesiál Oé-Cusse Ambeno (RAEOA), hasa’e koñesimentu kona-bá edukasaun inklusiva no literasia inisiál, ne’ebé fasilita husi Institutu Nasionál Formasaun Dosente no Profisionál ba Edukasaun (INFORDEPE).

Aurea Quintino Tilman, nu’udar formadora husi INFORDEPE, informa, formasaun ne’e hala’o durante loron lima, hahú segunda to’o sesta semana ne’e, fokuliu ba manorin sira husi Eskola Pré-Eskolár.

“Formasaun ne’e, ami iha konteúdu rua, kona-bá edukasaun inkluzivu no literasia inisiál,” formadora ne’e ba jornalista sira iha Oé-Cusse, kuarta ne’e.

Notísia relevante: RAEOA sei harii pre-eskolár iha aldeia 63 hodi redús traballu infantíl

Formadora ne’e, esplika, edukasaun inkluzivu, atu hatene labarik sira-nia problema kona-ba atividade rona, nune’e manorin sira presiza iha koñesimentu oinsá bele apoia labarik sira, intermu iha saladeaula atu tulun alunu sira, hodi hatene kuida saúde tilun ninian no hasa’e koñesimentu inan-aman atu tau matan.

Nia hateten, iha edukasaun inkluziva, oinsá manorin sira atu hatene kona-bá fatór sira-ne’ebé dalaruma halakon labarik nia abilidade rona, no hatene mós kona-bá grau sira, hanesan grau kmaan, lideradu no grau grave, tan ne’e mak dalaruma rezulta labarik sira bele lakon sira-nia abilidade hodi rona.

Iha parte literasía inisiál, hanesan matéria kontinuasaun tanba antes ne’e hala’o ona, tanba literasía insiál oinsá dezenvolve labarik nia abilidade, kona-bá lee emejénsia nian, entaun manorin pré-eskolár sira tenke hatene tanba bainbain labarik sira hahú tama iha pré-eskolár, tenke hatene uluk, oinsá mak labarik sira atu lee emerjénsia.

Diretór Serbisu Edukasaun Oé-Cusse, Vincencio Cono, informa, Ensinu Pré-Eskolár mak baze fundamentál tanba ne’e presiza estratéjia matéria pedagojika, didátiku no metodolojia ensinu nian liuhusi formasaun no kapasitasaun ba manorin sira.

“Tanba ita simu labarik mai ho kakutak mamuk loos, no presiza estratéjia matéria pedagojika, didátiku no metodolojia ensinu liuhusi formasaun, bele kapasita profesór sira, nune’e bele aplika iha prosesu ensinu aprendizajen loro-loron nian, depois halo klasifikasaun klase O ki’ik no O boot, tanba labarik mai ho kakutak mamuk, maibé ho prezensa manorin sira, ita hahú atu kombate literasia  no númerasia (menulis, membaca dan menghitung),” nia hateten.

Notísia relevante: RAEOA aloka millaun $2-resin harii eskola foun 19 no hadi’a edifísiu rua

Entretantu, formandu 35 ne’e mai husi Ensinu Pré-Eskolár 16, komposta husi  eskola públikubliku 13, eskola privada 1 no no eskola Katólika 2.

Jornalista: Abílio Elo Nini

Editór: Evaristo Soares Martins