EKONOMIA, HEADLINE

Sancha Pinto: “Emprezariedade nu’udar instrumentu promove inkluzaun sosiál no ekonómika”

Sancha Pinto: “Emprezariedade nu’udar instrumentu promove inkluzaun sosiál no ekonómika”

Logotipu MOVE

DILI, 29 maiu 2024 (TATOLI) – MOVE mak organizasaun naun-governamentál ida (NGO) husi Portugal no iha impaktu pozitivu ba ema nia moris iha nasaun sira ne’ebé ko’alia lian Portugés liuliu iha Timor-Leste, São Tome e Principé no Açores, Portugal.

Koordenadora MOVE iha Timor-Leste, Sancha Pinto, hateten organizasaun naun- lukru ida-ne’e fornese voluntáriu sira atu hasa’e konsiénsia no treinu emprezáriu sira hodi asegura dezenvolvimentu projetu sira ne’ebé metin no sustentavel. Voluntáriu sira kria solusaun foun atu apoia kreximentu kontinua iha indústria oi-oin no asegura emprezáriu sira implementa estratéjia negósiu viavel sira.

“Importánsia emprezariedade nu’udar instrumentu ida-ne’ebé forte hodi promove inkluzaun sosiál no ekonómika,” Sancha Pinto informa ba TATOLI iha nia kna’ar fatin UN Kampaun, Caicoli, Dili, ohin.

Nia dehan, emprezariedade bele sai nu’udar meiu ida-ne’ebé efetivu hodi fó kbiit ba individuál sira, hodi permite sira kria oportunidade emprezariál sira ne’ebé bele lori ba auto-sufisiénsia no kresimentu ekonómiku sustentavel.

“Ami durante ne’e servisu iha métodu tolu, hanesan WAKE husi zero ba ideia, SHAKE husi ideia ba modelu negósiu no MAKE husi modelu negósiu ba sustentabilidade. WAKE no SHAKE servisu hanesan kursu formasaun no MAKE hanesan reuniaun semana-semana oinsá atu apoiu pesoál ba emprezáriu ida-idak ba  mikro konsultasaun nian,” nia relata.

Koordenadora ne’e haktuir, MOVE to’o iha Timor-Leste iha 2011, ho objetivu atu hasai ema husi siklu ki’ak liuhusi emprezariedade. “Tanba ne’e, buat ne’ebé ami-nia voluntáriu sira halo iha ne’e mak fó materiál ne’ebé sufisiente ba emprezáriu sira atu bele sai sira-nia negósiu rasik”.

Koordenadora Sancha Pinto afirma, kona-ba formasaun ne’ebé organizasaun fó ne’e  ba emprezáriu timoroan sira, benefisiáriu sira husi MOVE hetan susesu iha área oi-oin, hanesan iha área restaurante, arte no merkadoria dijitál.

“Ha’u bele dehan katak ami iha ona emprezáriu na’in-15 ne’ebé hetan ona apoiu iha MAKE no ami iha ona istória susesu hanesan Kios Matenek no Mehi Cafetaria,” nia tenik.

Tuir dadus MOVE, entre tinan-2020 no 2023, fó treinamentu ba ema na’in-21 iha WAKE, ema na’in-30 iha SHAKE, no mós apoia projetu 20 iha MAKE.

“Ba treinamentu WAKE nian ita presiza de’it atu iha hakarak kria ideia negósiu nian no ba SHAKE ita presiza iha ideia konkretu kona-ba negósiu ne’ebé ita hakarak kria; bele individuál ka grupu, importante atu iha ideia klaru,” nia esplika.

Nia rekoñese katak MOVE hanesan organizasaun ida-ne’ebé relativamente foun no la iha baze finanseiru atu apoia voluntáriu sira-nia  maibé tenke selu rasik.

Jornalista   : Felicidade Ximenes

Editór           : Rafael Ximenes de A. Belo

iklan
iklan

Leave a Reply

iklan
error: Content is protected !!